Сентябрь 11-де Тываның күрүне университединиң хуралдаар залынга «Тываның маадырлары» регионалдыг программаның киржикчилери дагдыныкчылары-биле ужурашкан. Программаның өөредиглиг чадазы болуп эрткени ол.
Аңаа ТР-ниң Чазааның Даргазының оралакчызының хүлээлгезин күүседип турар Айдыс Сынаа болгаш өске-даа удуртукчулар программаның киржикчилери-биле ужурашкан.
«Маадырларның үези» деп федералдыг төлевилелди калбартыры-биле, Президентиниң академиязының боттандырып турары бо программа тускай шериг операциязының киржикчилерин деткиир болгаш профессионал талазы-биле сайзырадыр сорулга-биле эгелээн. Тускай шериг операциязының киржикчилеринге келир үеже орукту ажыдып, күрүне албан черлеринге канчаар ажылдаарын өөредиринче угланган.
Программаның киржикчилери ийи неделя дургузунда мастер-класстарны, тренингилерни эртип, «Күрүне болгаш муниципалдыг башкарылгаже» сиңнигип, дуржулганы алганнар. Ук ужуражылгага Тыва Республиканың Чазааның Даргазының оралакчызының хүлээлгезин күүседип турар Айдыс Сынаа келгеш, тускай шериг операциязының дайынчыларынга регионнуң бо программазынга киржири чугула деткимче дээрзин онзалап демдеглээн.
«Регионалдыг программаның ийиги чадазын эрттирип турарывыс бо. Бо ужуражылгага программаның киржикчилери дагдыныкчылары-биле ужуражып, таныжып алыр. Ооң соонда олар аразында сырый харылзаалыг ажылдап эгелээр. Дагдыныкчының кол сорулгазы – киржикчилерниң хууда болгаш профессионал сайзыралынга, өзүлдезинге дуза чедирери болур.
Күрүне ажылынга кирип келгеш, ажыл-агыйны канчаар күүседирин, кандыг бергедээшкиннерге таваржы берип болурун, оларны канчаар ажып эртерин дагдыныкчылар хүлээнгени өөреникчилеринге өөредип, эчизинге чедир арга-сүмезин кадар ужурлуг. А программаның киржикчилериниң кол сорулгазы болза болдунар-ла шаа-биле бүгү чүүлге өөренир, билдинмес чүүлдерни дагдыныкчыларындан айтырып, күрүне ажылынга ажылдаарының чажыттарын шиңгээдип алырын оралдажыр. Ниитизи-биле бо хүнде 26 киржикчи бар» – деп, Айдыс Сынаа чугаалаан.
«Тываның маадырлары» программага дагдыныкчылар корпузу арга-дуржулгалыг удуртукчулардан – регион чагырга органнарының, тус чер чагырга органнарының, күрүне албан черлериниң болгаш организацияларының удуртукчуларындан болгаш оралакчыларындан тургустунган.
«Дагдыныкчы болуп, ТШО-нуң киржикчилери-биле ажылдаары меңээ алдар-хүндү болгаш улуг харыысалга-дыр. Чедиишкинниг болур бис дээрзинге идегээр-дир мен. Бо оолдар патриотчу чоруктуң дириг үлегери дээрзин Президент бодунуң оларга хамаарылгазы-биле көргүзүп тур. Чылдар дургузунда күрүнеге бараан болуп, ажылдап келген дуржулгавысты болгаш билиивисти программаның киржикчилеринге дамчыдарын оралдажыр бис» – деп, Тыва Республиканың Күш-ажыл болгаш социал политика сайыды Эдуард Сандан бодунуң бодалын илеретти.
Ажыл-агыйжы хуралдың соонда программаның киржикчилери дагдыныкчылары-биле аңгы-аңгы аудиторияларга ужуражып чугаалашкан. Ук ужуражылгалар ТШО-нуң киржикчилериниң дагдыныкчылары-биле кады ажылдажылгазының, келир үезиниң таваа болганы чугаажок.
Ук программаның киржикчилери 600 кордакчының аразындан шилиттинген эң-не шыырак дээн дайынчылар дээрзин сагындыраал. Оларның бирээзи РФ-тиң Маадыры Буян Куулар.
«Бөгүн дагдыныкчыларывыс-биле ужураштывыс, дыка эки хүн болду. Чамдык киржикчилер дагдыныкчылары-биле бөгүн бир дугаар ужуражып турар. Мээң дагдыныкчым Тыва Республиканың Баштыңы Владислав Товарищтайович Ховалыг болду. Дыка өөрүп тур мен. Ук программаның баштайгы доозукчулары болурувус бо. Бодувуска болгаш дайынчы эш-өөрүмге чедиишкиннерни күзедим. Ажылдап кылган регионалдыг программа дээш ал-бодумнуң болгаш дайынчы эштеримниң өмүнээзинден өөрүп четтиргенимни илереттим!»
Айдың ОНДАР.
Буян ООРЖАКТЫҢ тырттырган чуруктары.
“Шын” №36 2025 чылдың сентябрь 18
