Июль 1-де Дайынчы хөделиишкиннер хоочуннарының хүнүн демдеглеп эрттирген. Дайынчы хөделиишкиннер хоочуннары дээрге ёзулуг маадырлар-дыр. Оларның эрес-дидими болгаш боттарын хайырлавааны бистиң хүндүткеливисти база өөрүп четтириишкинивисти чаалап алган. Ук хоочуннарның когаралы болгаш маадырлыг чоруу чүнүң-биле-даа деңнээр аргажок. Ол дугайында хүн бүрүде сактып чоруур ужурлуг бис.
Найысылал Кызылдың Тиилелге шөлүнге байырлыг митинг болуп эрткен. Аңаа Ада-чуртун камгалаар шериг албан-хүлээлгезин күүседип, Россия дээш дайынчы хөделиишкиннерге киржип тургаш, амы-тынындан чарылган дайынчыларны сактып, чечектерни салган.
Тываның Баштыңы Владислав Ховалыг республиканың Чазааның кежигүннери, депутаттар болгаш чепсектиг күштер тургузугларының удуртулгазы-биле кады бистиң чуртувус дээш тулчуушкуннарга бажын салган маадырларны сактып, хүндүткээн.
“Бөгүн дайынчы хөделиишкиннер хоочуннарынга, шериг хүлээлгезин күүседиринче кыйгыртканнарга болгаш хууда хамааты туружун идепкейлиг тудуп чоруурларга хүндүткелдиң ёзузун көргүзүп тур бис. Ол ышкаш бистиң аравыста чок хоочуннарны база хүндүткел-биле сагындывыс.
Хүндүлүг, хоочуннар! Силерге бүгү ниитилел деңнежип турар. Бис силерге чоргаарланыр бис! Хүндүлүг дыштанылгаже чорупкаш безин, патриотчу кижизидилгени чорудуп, кады ажылдап чоруур эштериңерни болгаш оларның өг-бүлелерин деткип, үргүлчү дуза кадып келиринге белен силер. Чурттуң Президентизи ындыг улуг күчү-күштү билгеш, ТШО хоочуннарынга “Маадырлар үези” деп удуртулга төлевилелин салган” – деп, бодунуң блогунга Владислав Ховалыг бижээн.
Москва хоорайда ТР-ниң Бүрүн эргелиг төлээ чери база аңгы-аңгы чылдарда шериг хүлээлгезин маадырлыы-биле күүсеткеннерни ханы хүндүткел-биле сактып, бистиң чуртувусту камгалаарын уламчылап турарларга хүндүткелдиң ёзузун көргүскен.
Маадырлыы-биле амы-тынындан чарылганнарның дугайында сактыышкын оларның тулчуп чорааны тайбыңның болгаш хосталганың үнезин биске сагындырар болзун. Аравыста чурттап чоруур хоочуннар бистиң деткимчевисти, чуртувусту камгалаар ажыл-албанынга бердинип чорууру дээш өөрүп четтиргенивисти билип каар дээрзин төлээ чериниң кежигүннери демдеглээн.
Хүндүлүг хоочуннар, силерге четтирдивис!
Чыжыргана СААЯ.
Буян ООРЖАКТЫҢ тырттырган чуруктары.
“Шын” №49 2024 чылдың июль 3
