Чаа чылдың байырлал хүннериниң бүдүүзүнде, декабрь 30-де, Владивостокта шериг госпиталында чыдар Тыва чурттуг балыглаткан дайынчы төрүттүнген хүнүнде манавааны чигирзиг белекти алган. Ону Тыва Республиканың шериг комиссариадының ажылдакчылары Ыраккы Чөөн чүкте чурттап турар чаңгыс чер чурттуувустан дамчыткан чүве-дир.
Игорь Сапогов Владивостокта үжен хире чыл чурттап-ажылдап турза-даа, төрээн чери-биле харылзаазын үспээн. Кажан Тывадан олче долгап, балыгланган шеригге белекти дамчыдып бээрин дилээрге, доп-дораан чөпшээрежип, ол-ла хүн белекти дамчыдып берген.
Чаңгыс чер чурттугларының сагыш човаашкынынга сеткили өөрээн дайынчы ону утпайн, төрүттүнген хүнүнде байыр чедирген бүгү-ле чаңгыс чер чурттугларынга өөрүп четтириишкинин илереткен.
Шериг чажыдынга дүүштүр, балыглаткан дайынчының адын тода адавайн, чүгле “Н” деп адап алыылы.
«Н» зениттиг батареяже снарядтар дажыглап турган. Ээлчеглиг рейс үезинде автомобиль украин диверсантыларның кедээнге таварышкан, ооң үезинде «Н» бажынче балыглаткан. Артык күштүг дайзын чеже-даа шаап халдап турза, медерел чок эжин шериглер чаашкын дег октар адаандан үндүрүп эккелгеннер. Шупту улус ону өлген деп бодаан, чүге дизе ындыг балыгланыышкын алганда, дириг артары берге. Ынчалзажок дайынчының хыналдазын чорудуп турган шериг фельдшер: “Судалы бар кижи-дир” – деп, алгырып үнген. Москваның госпиталы, ооң соонда Владивостокче нарын ужудуушкун. Амгы үеде «Н» кылаштап эгелээн, ынчалза-даа баш сөөгүнге протез салыры-биле база бир кезиишкин бар.
Дидим дайынчыга кадыкшылды күзеп, сегип алгаш, аал-чуртунче дүрген чанып келирин күзедивис.
ТР-ниң шериг комиссариадының медээзинден А. ХЕРТЕК белеткээн.
"Шын" №2 2024 чылдың январь 13
