Тускай шериг операцияның киржикчилери дайынчыларның эмнээшкин болгаш реабилитация эртип турары Россияның национал гвардиязының Кол шериг клиниказында эмнедип чыдар дайынчылар-биле Россияда Буддийжи чүдүлгениң төлээлери ужурашкан.
Россияның национал гвардиязының Кол шериг-политиктиг эргелелиниң начальниги генерал-майор Денис Ермаков, Тыва Республиканың Чазааның Даргазының оралакчы- зы – Тыва Республиканың Москвада бүрүн эргелиг төлээзи Чечен Чоксум, Россияның Буддийжи Сангхи ниитилелиниң Москвада төлээ чериниң удуртукчузу Дид Хамбо лама Даши-Нима Содномдоржиев, Россияның национал гвардиязының Кол шериг клиниказының начальниги медицина албанының полковниги Олег Багаев, Алтай болгаш Тыва республикаларның алдарлыг артизи Амаду Мамадаков болгаш Росгвардияның төп аппарадының офицерлери ужуражыышкынга киришкен.
Россияның национал гвардиязының Кол шериг клиниказында эмнедип чыдар дайынчылар-биле аалчылар чугаалажып, дүрген экирип, кадыкшылы быжыга бээрин күзеп, сагыш-сеткили болгаш тура-соруу күштүг боорун чагып, российжи буддийжи ниитилелдиң мурнундан белектерни дайынчыларга берген.
Тускай шериг операцияның киржикчилерин болгаш оларның чоок кижилерин камгалаар мөргүлдү Дид Хамбо лама Даши-Нима Содномдоржиев эрттирип, дайынчылар дүрген сегиириниң болгаш тура-соруу күштүг болурунуң сарыг шажын судурларын номчаан.
Россияның национал гвардиязының Кол шериг клиниказында амгы үеде Тывадан беш дайынчы эмнедип чыдар, оларның үжү ужуражыышкынга келген. Ийи дайынчы кезиишкин операция соонда эмнедип чыдар, ынчангаш оларның палатазынга Чечен Чоксум, Дид Хамбо лама Даши-Нима Содномдоржиев, Амаду Мамадаков барып, дайынчылар-биле ужуражып, амданныг аъш-чемни берген. Тывадан дайынчыларның дүрген сегий бээри дээш Дид Хамбо лама Даши-Нима Содномдоржиев ыдыктыг судурларны номчаан. Тускай шериг операцияның гуманитарлыг ажыл-херектериниң доктаамал киржикчизи Амаду Мамадаков бистиң республикадан дайынчыларга дүрген сегиирин күзеп, оларның-биле чурукка тырттырып алган.
Тыва Республиканың Чазааның Даргазының оралакчызы – Тыва Республиканың Москвада бүрүн эргелиг төлээзи Чечен Чоксум дайынчылар-биле амы-хууда ужурашкаш, тускай шериг операцияның мурнуку одуругларынга оларның эрес-маадырлыг чоруун, төрээн чурттуң камгалалынга киирген улуг үлүүн демдеглээн. Чаңгыс чер чурттуглары-биле ужуражыышкын үезинде Тыва Республиканың Чазааның Даргазының оралакчызы Чечен Чоксум оларны дүвүредип турар чүүлдерни билип ап, айтырыгларны шиитпирлээринге боду хууда киржирин аазаан.
Бистиң чаңгыс чер чурттугларывыс дайынчылар чоок кижилеринге видеоматериалды бижидип, боттарының кадыының байдалының дугайында чугаалап, шупту чүве эки болур күзелин илереткеннер.
Ш. ЛОПСАН белеткээн.
Чурукту интернеттен хоолгалаан.
“Шын” №71 2024 чылдың сентябрь 18
