Ноябрь 14-те ТР-ниң Дээди Хуралынга (парламентизинге) "Чаңгыс демниг Россия" партиязының эгелээшкини-биле "Чылыг-чымчак одуруглар" деп акцияны организастап эрттирген. Ук хемчегге коммерциялыг эвес албан черлериниң төлээлери, чалыы армейжилер, хоорайның болгаш Дээди Хуралдың депутаттары база оон-даа өске сагыш човангыр кижилер киришкен.
Ооң кол сорулгазы — буянныг ажыл-агыйны деткиири болгаш нептередири. Акцияның киржикчилери ТШО девискээринде бистиң дайынчыларывыска чылыг-чымчак сөстерни, чаагай күзээшкиннерни бижээш, чагаа хавынга суккаш, чорутканнар.
Тываның Дээди Хуралының депутады Анджела Канчыыр-оолдуң демдеглеп турары-биле алырга, бо акцияны чүгле Тывада эвес, а бүгү чуртта организастап турар. "Бистиң республикадан бо акцияга өөреникчилер, бөдүүн чурттакчы чон, партиялар кежигүннери, ол ышкаш Дээди Хуралдың депутаттары киржип турар. Бо акция кончуг чугула деп санаттынар. Чүге дизе ол бистиң уругларывыстың патриотчу талазын кижизидип турар, а солдаттарга бистиң сагыш-сеткиливис ханызындан бижиттинген чагааларывысты чедирер. Бо чылыг-чымчак сөстер бистиң дайынчыларывыстың хей-аъдын көдүрүп, сагыш-сеткилин сергедип, деткиир боор дээрзинге бүзүреп тур бис” – деп, Анджела Канчыыр-оол чугаалаан.
Кызылдың башкы колледжизиниң 2-ги курсчулары дайынчы акыларынга деткимче болур сөстерни бижип, дамчыдар дээш, башкызы-биле кады чедип келгеннер. Оларның бирээзи Елена Оюн дайынчы чаңгыс чер чурттугларывысче деткимче сөстерни бижип чорудары дээрге ачы-дузаның база бир хевири деп санаан. “Шак бо акцияга киришкеш, шериглеривиске боттарывыстың ынакшылывысты, эрес-дидим чоруу дээш өөрүп четтиргенивисти дамчыдар аргалыг болдувус. Бис мында силер дээш сагыш човап, онча-менди чанып келириңерни манап тур бис” – деп, Елена Оюн чугаалаан. Шак мындыг чагаалар оларның хей-аъдын көдүрер дээрзинге ол бүзүрээр.
Ол ышкаш Кызылдың 2 дугаар школазының чалыы армейжилери база хөйү-биле бо хемчегге киржип кээп турары өөрүнчүг. Дайынчы чаңгыс чер чурттугларынче чагааны бижип тургаш, оларның чер-чуртунга ынакшылы, патриотчу тура-соруу улам быжыгар. Сески классчы Каң-Демир Куулар дайынчылар оларның бижээн чылыг-чымчак сөстерин номчааш, чаңгыс чер чурттуглары оларны манап турарын билип, сорук кирип, улам-на чалгынналыр дээрзинге идегеп турар. “Силерни бис сактып, бодап чоруурувусту кажан-даа утпаңар. Чер-чуртувусту коргуш чокка камгалап чорууруңарга чоргаарланыр бис. Оон-даа артык дидим, күштүг болуп, черле тура дүшпезиңерни күзедим” – деп, Каң-Демир Куулар чугаалаан.
Чыжыргана СААЯ.
Ада Тюлюштуң тырттырган чуруктары.
“Шын” №88 2024 чылдың ноябрь 16
