Тываның найысылалынга үш региондан Ада-чурт дайынчыларының өг-бүлелериниң комитеттериниң төлээлериниң хуралы болуп эрткен. Кол те-ма – дайынчыларга деткимче.
“Ада-чурт камгалакчылары» күрүне фондузунуң регионалдыг салбырының оран-савазынга Тывадан, Алтайдан база Хакасиядан Ада-чурт дайынчыларының өг-бүлелериниң регионалдыг комитеттериниң удуртукчулары ужуражылгага киришкеннер.
“Ужуражылганы регионнар аразында арга-дуржулга солчуру-биле эрттирген. Онза кичээнгейни шериг эрге-хоойлу терминнериниң тодаргай тайылбырынче угландырган. Чүге дизе хөй кезии хамаатыларга ук айтырыглар кайы-даа регионда берге болуп турар”— деп, Алтай Республиканың Ада-чурт дайынчыларының өг-бүлелериниң комитединиң удуртукчузу Ольга Старыгина демдеглээн.
Ооң чугаазы-биле алырга, тускай шериг операциязы эгелээнден бээр дөрт чыл дургузунда хамаатыларның дилээшкиннериниң саны каш дакпыр көвүдээн. «Бис билдириишкин киирген кижилерни эгезинден төнчүзүнге чедир, төлевирлерни сайгарарындан эгелээш, бүрүнү-биле эмненип алырынга чедир дузалажып турар бис» — деп, Ольга Старыгина тайылбырлаан.
Красноярск крайның Минусинск хоорайның дайынчыларының өг-бүлелериниң комитединиң удуртукчузу Евгения Тефельдиң чугаазы-биле алырга, шериг албанныгларның дүвүредип турар айтырыгларын шиитпирлээр дээрге, дыл талазы-биле шаптараазыннарлыг болуп турар дээрзин чугаалаан: “Бистиң эрес-дидим дайынчыларывыстың хөй кезии боттарының айтырыын таптыг тайылбырлап шыдавас. Ынчангаш оларга дузалаары чугула”.
Тываның Ада-чурт дайынчыларының өг-бүлелериниң комитединиң удуртукчузу Лада Натпит бир хонук бурунгаар Минусинск хоорайга база шак мындыг хемчег болганын дыңнаткан.
«Алтайдан дайынчыларга дузалажып, волонтер-юрист болуп ийи чыл ажылдаан специалисти чалаан бис, арга-дуржулгазын үлешкен, хоойлуда өскерилгелер дугайында чугаалап, хөй айтырыгларга харыылаан кижи» — деп, Лада Натпит демдеглээн.
Ужуражылганың түңнелинде киржикчилер регионнар аразында харылзааны быжыглаарынга база дайынчыларга болгаш оларның өг-бүлелеринге ачы-дузаның шынарын бедидеринге мындыг чижектиг хемчеглерниң чугулазын демдеглээннер.
Бистиң корр.
Буян Ооржактың тырттырган чуруу.
