Май 1-де тускай шериг операциязының киржикчилерин деткиир «Муzыка о CVOих» деп фестиваль эгелээн. В.М. Халилов аттыг Тываның күрүне филармониязының даштынга ооң ажыдыышкынын кылгаш, Тываның 5 хоорайынче “Тиилелге бистии болур” деп кыйгырыг-биле тускай дериттинген машиналар чорупкан. Май 1-де Кызыл хоорайдан эгелээш, улаштыр Туран, Шагаан-Арыгга четкеш, 2-де Чадаанага, Ак-Довуракка барган. Хоорай бүрүзүнге шериг-патриотчу ырыларны, ооң иштинде ук фестивальга тураскааткан «МуZыка о CVOих» деп ТШО дугайында республика чергелиг чаа ырылар мөөрейинге тиилекчи болган ырыларны бараалгаткан.
Ук мөөрейге киришкен ырыларны ТШО дугайында ырылар чыындызынче киирер. «МуZыка о CVOих» деп фестиваль-биле бичии уруглар аразынга республика чергелиг “Мээң маадырым” деп чурук мөөрейи база болган. Ооң тиилекчилериниң чуруктары-биле чыындыны каастаар.
Тываның күрүне филармониязының болгаш “Саяннар” ансамблиниң хоочуннар төвүнүң боттандырып турары фестивалы Президентиниң культурлуг эгелээшкиннер фондузунуң грантызының акшаландырыышкыны-биле 2023 чылдың күзүн эгелээн.
ТШО киржикчилерин деткиир «Муzыка о CVOих» фестиваль ук грант-биле боттанып турар ТШО киржикчилерин деткииринче угланган бир дугаар төлевилел.
Оон аңгыда, фестивальга кызыгаарланып, шүлүкчүлер, композиторлар, хөгжүмчүлер, ыраажылар мастер-класстарны, лекторийлерни, Россияның Маадыры Мерген Донгак-биле ужуражылгаларны эрттирип, Радомир Балганның чураан “Ат-алдарның аллеязы” деп ТШО-га амы-тынындан чарылган дайынчыларның чуруктарының, “Мээң маадырым” деп уругларның чурук мөөрейиниң делгелгелерин организастап турар.
Ол ышкаш төлевилел-биле тургускан Тываның ТШО-га киришкен маадырларының дугайында документалдыг фильмни көргүзери база ынаар кирген. Фестиваль ниитизи-биле 19 хемчегден тургустунган. ТШО дугайында чаа ырыларны бараалгадыр Гала-концерт-биле фестиваль доостур.
Чыжыргана СААЯ.
Буян ООРЖАКТЫҢ тырттырган чуруктары.
«Шын» №33 2024 чылдың май 4
