Бир эвес долу эвес мобилизацияга таварышкан хамааты кады чурттаан эжи-биле бадылга чок болза, чоруур бетинде ТР-ниң ХБАБ эргелелинче долгааш, дарый бадыланчыр дугайында дилегни киирип болур.
ТР-ниң ХБАБ килдис эргелекчизиниң оралакчызы Орлана Оюннуң медеглээни-биле алырга, Кызыл хоорайның ол чарыында турар мотоадыгжы 55-ки бригадада чоруурунга белеткенип турар курлавырда шериг оолдар ол арганы ажыглап, баштайгы хүнде 6, а дараазында 13 аныяк өг-бүлелер бадыланышкан.
Албан-хүлээлгезин күүседип чоруп турар Роман Куулар:
– Улуг-Хемниң Шагаан-Арыг чурттуг мен. 37 харлыг мен. Долу эвес мобилизацияга таваржы бердим. Шериг албан-хүлээлгемни черле эрттирер апаар мен. Ооң мурнунда Чечен Республикага болган дайынга киржип чораан дуржулгам бар. Келдириишкин келир боор деп бүдүү иштимде билип турдум. Өөм ишти Чодураа Артемевна Чооду-биле бадылга бижик чок чурттап чораан бис. Чаңгыс кыс уруглуг бис. Мындыг чүүлдер болу бээр деп бодавайн турдувус. Хенертен албан-хүлээлге күүседип чоруур деп барган болгаш, дарый бадыланчыр дугайында дилегни кииреривиске, бисче удур базымнарны кылып чедип келгенинге өөрүп четтирер-дир бис.
Долума Шораановна, Мерген Хеймер-оолович Чамзырыннарның өг-бүлези база дарый-дүрген бадыланчыр ужурга таварышкан. Олар ийи кыстың ада-иези. Шораан Хеймер-оолович долу эвес мобилизацияже келдиртиишкин алган. Күзелдии-биле шериг албан-хүлээлгезин күүседиринге белен.
Айдың ОНДАР.
Буян ООРЖАКТЫҢ тырттырган чуруктары.
