РФ-тиң Президентизи В.В. Путинниң даалгазы-биле Россияның Чазаа 12 национал төлевилелди ажылдап кылган. Шак ол төлевилелче ниитизи-биле 25,7 трлн рубль көрдүнген турган.
«Кадык камгалалы», «Өөредилге», «Демография», «Культура», «Айыыл чок болгаш шынарлыг автомобиль оруктары», «Чуртталга оран-савазы болгаш таарымчалыг хоорай хүрээлеңи», «Экология», «Эртем», «Биче база ортумак сайгарлыкчы чорук болгаш амы-хууда сайгарлыкчы чорукту деткиири», «Чурагайлыг экономика», «Күш-ажылдың бүдүрүкчүлүү болгаш ажылга хаара тудар чорукту деткиири», «Чурттар аразының кооперациязы болгаш экспорт» национал төлевилелдер мурнады хөгжүдер угланыышкыннарга хамааржыр.
«Демография» национал төлевилел амыдыралга кадык овур-хевирни суртаалдаар болгаш өзүп-көвүдээр чорукка деткимче болгу дег базымнарны боттандырарынче угланган. Ол дээрге амыдыралдың кадык овур-хевиринче идиг бээр системаны хевирлээри, улуг салгалдың азы хоочуннарның амыдыралының деңнелин бедидип, күш-культура болгаш спорт-биле «өңнүктежиринге» таарымчалыг байдалдарны тургузары, чаштар төрүттүнгенде, саң-хөө дузаламчызы база ол ышкаш чонну ажылга хаара тудары.
«Демография» национал төлевилелче кирип турар беш федералдыг төлевилелдиң шуптузунда Тыва киржип турар. Оларның бирээзи Дерзиг-Аксы интернаттың оран-савазының тудуу.
Тываның күш-ажыл болгаш социал политика сайыды Эдуард Сандан Каа-Хем кожууннуң Дерзиг-Аксы суурда дазылга бажыңында тудуг ажылдарын хынап көргенин яамы дыңнаткан.
Амгы үеде объектиде тудуг ажылдары 57,5 хуу күүсеттинген. Дазылга бажыңының тудуунуң хүлээникчи организациязы – "Бастион" кызыгаарлыг харыысалгалыг ниитилел.
Хамаатыларны болгаш кадыкшылының байдалы-биле харык-шинээ кызыгаарлыг хамаатыларны хайгаарап-чурттадырынга көрдүнген албан чери 180 оруннуг болур.
Интернаттың социал ачы-дуза алыкчыларының негелделери езугаар таарымчалыг байдалдарны хандырар. Корпустарга аңгы арыгланыр черлиг, ийи орун салыр өрээлдерни тускайлаар. Административтиг оран-савада көрүкчүлер залы, кино көөр чер, номчуттунар черлиг ном саңы, бөлгүмнер болгаш хөгжүм кичээлдеринге, диш болгаш херээженнер эмчилеринге өрээлдерни тускайлаар, сенсорлуг өрээл база турары планда көрдүнген. Эмнээшкинниг күш-ажыл мастерскаяларынга аңгы шөлдерни дериир.
ТМГ-ниң медээлеринден.
«Шын» №1 2025 чылдың январь 16
