Тываның Чазааның бажыңынга тускай шериг операциязының үезинде дайынчы даалгаларын күүседип тура шылгараан шериг албанныгларны шаңнаар езулал байырлыг байдалга болуп эрткен. Россияның болгаш Тываның дээди күрүне шаңналдарын республиканың Баштыңы Владислав Ховалыг боду тыпсып, шаңнатканнарның кижи бүрүзү – Ада-чурттуң езулуг эрес-дидим маадырлары деп чугаалаан.
«Тываның чурттакчыларының мурнундан, а ол ышкаш бодумнуң өмүнээмден көргүскен эрес-дидим, туруштуг чорууңар болгаш профессионализмиңер дээш өөрүп четтиргенимни илергейлеп тур мен. Бүдүн республика, чурт силерге чоргаарланып, деткип база ынанып турар. Силерниң чоок кижилериңерниң эрес-дидим, шыдамык чоруунга өөрүп четтирдим. Мында, республика иштинде, силерге болгаш силерниң өг-бүлелериңерге бүгү талалыг дузаны чедирер дээш, кызып турар бис. Ада-чуртту камгалажып, амы-тыныңарны артынга каапкаш, дайынчы хүлээлгелериңерни күүседип чорууруңар дээш курлак чедир мөгейдивис”.
Тываның дээди шаңналдарының бирээзи, Буян-Бадыргы орденниң III чергезин Мерген Шалыкка тывыскан. Ооң маадырлыг чоруунуң дугайында төп массалыг информация чепсектери бүдүн чуртка тараткан. Россияның мото-адыгжыларының хүрээлелинге ефрейтор Шалык Луганск Улус Республиканың чурттакчылыг черлериниң бирээзин украин националистерниң чепсектиг тургустунган шериг кезектеринден хостажып турган. Кагдынган ээн оран-саваның үстүкү каъдындан удурланыкчының эки камгалалдыг от ажыдар туруштарын илередип, тодарадып алгаш, ефрейтор Шалык ооң дугайында бодунуң командиринге шалыпкыны-биле илеткээн. Ооң соонда октар чаъс дег чаап турза-даа, дайзынның пулемедун узуткап, бодунуң хуузунда 10 хире дайзынны чылча шапкан.
Мерген болгаш ооң дайынчы эштери күрүне шаңналдары-биле, ооң иштинде төрээн республиказының база, шаңнатканының дугайында Владислав Ховалыг дайынчылар-биле чоокта чаа болган ужуражылгазының үезинде медеглээн. Ук ужуражылгага Россияның Президентизи Владимир Путинниң тускай шериг операциязынга мөчээн дайынчыларның болгаш хоочуннарның өг-бүлелеринге адрестиг дуза чедирер тускай Фондуну ажыдарының дугайында эгелээшкинин республикага боттандырар дээш, кандыг хемчеглерни ап турарын чугаалашкан.
Дайынчы хүлээлге күүселдезиниң үезинде көргүскен эрес-дидим чоруу дээш алды тыва шериг албанныгга Россия Федерациязының Президентизиниң Чарлыы- биле “Эрес-дидим чоруу дээш” деп медальдарны тывыскан. А дөрт дайынчы Суворов медалынга, бирээзи РФ-тиң Камгалал яамызының “Дайынчы шылгарал дээш” деп медалынга төлептиг болган.
/Алдынай АРАКЧАА.
"Шын" 2023 чылдың апрель 5 №24
#Шынсолун #Тыва #ТываныңЧазаа #ТываныңБаштыңы #ДээдиШаңнал #Ада_Чурт
