Хүреш делегейинде онза болуушкуннар
17 хар чедир элээди оолдар, уруглар аразынга делегейниң бирги чери дээш спортчу хүрештер маргылдаазы август 19–25 хүннеринде Иорданияның төвү Амман хоорайга болуп эрткен.
Ол маргылдаага Россияның чалыы мөгелери эки хүрешкеш, 3 алдын, 4 мөңгүн, 7 хүлер медальдарны чаалап алганнар. Бистиң чаңгыс чер чурттуувус, Чадаананың Чечен-оол Монгуш аттыг олимпийжи курлавырлар спорт школазының мөгези Чингис Сарыглар (тренери Меңги Монгуш) чүткүлдүг эки хүрежин көргүзүп, 48 килге чедир мөгелер аразынга 3 дугаар шаңналдыг черни ап, хүлер медальды чаалап эккелген.
Чингиз Тывада 17 харга чедир мөгелер аразында делегей маргылдаазындан 1 дугаар медаль эккелген мөге. Өске чурттуң мөгелеринден: АКШ-тың мөгелери 5 алдын, Иранның 4 алдын, Кыргыстанның 3 алдын, Индияның элээди мөгелери кайгамчык хүрежип, 5 алдын, 1 мөңгүн, 1 хүлер медальдарны алганнар.
А. ЧАМБАЛ-ООЛ.
“Шын” №67 2024 чылдың сентябрь 4
