Хөөмей хүнүн республикада чылдыӊ-на август 17-де демдеглеп турар.
Тыва чоннуӊ ада-өгбелеринден дамчып келген онзагай болгаш ховар уран чүүлүн кадагалап арттырар сорулга-биле ук байырлалды 2015 чылдыӊ август 12-де ТР-ниӊ Баштыӊы Ш.В. Кара-оолдуӊ 133 дугаарлыг чарлыы-биле доктааткан.
Хөөмейлээр, каргыраалаар, сыгыртыр онза салым чаяанныг кижилерге аӊгы хүндүткелдиг ат тыпсырыныӊ дугайында ук чарлыкта айтып каан. Тыва Республиканыӊ Баштыӊы Владислав Ховалыг Хөөмей хүнүн таварыштыр байыр чедирген.
«Хөөмей хүнү-биле, эргим чонум! Хүндүлүг бистиң хөөмейжилеривис, хөөмей ырын камгалап, кадагалап, хөгжүдүп сайзырадып база нептередиринге үнелеп четпес сагыш салыышкыныңар дээш, өөрүп четтиргенимни тыва чоннуң мурнундан база бодумнуң өмүнээмден илередип көрейн.
2023 чылдыӊ май 9-та – Улуг Тиилелге хүнүнде Луганск Улус Республиказында бистиӊ дузалажып турарывыс Свердловск хоорайныӊ чурттакчыларынга, тускай шериг операциязыныӊ киржикчилеринге сыгыт-хөөмейни ат-сураглыг хөөмейжи Коӊгар-оол Борисович Ондарныӊ салым-чаяанныг өөреникчизи Эртине Тумат бараалгаткан.
Хөөмей деп сөске очулга-даа херек чок, чүге дизе хөөмей-сыгыт дузазы-биле бүгү сагыш-сеткилди илередип болур. Омакшылы, чүдүлге-сүзүү, культуразындан-даа хамаарылга чокка, сеткил хөөнүн билип алыр интернационалчы дыл апарган.
Делегейде хөөмейниӊ ат-сураглыг апарганы дээрге хөөмейжилерниӊ, каргыраажыларныӊ, сыгытчыларныӊ бедик мергежилиниӊ, кайгамчыктыг салым-чаяаныныӊ, карак кызыл болгаш чүткүлдүг күш-ажылыныӊ түӊнели-дир» – деп, республиканыӊ удуртукчузу блогунга бижээн.
Тыва чоннуӊ онзагай уран чүүлүн кадаглап арттырарынга, ону сайзырадырынга болгаш сурагжыдарынга үнелеп четпес үлүг-хуузун киирип чорууру дээш, Тываныӊ Баштыӊы Владислав Ховалыг хөөмейжилерге өөрүп четтиргенин илереткен.
Р. Демчик белеткээн.