Август 9 – Делегейниӊ үндезин чоннарыныӊ делегей хүнү.
Делегей чоннарыныӊ культуразын болгаш төрээн дылын кадагалап арттырарынга тураскааткан байырлал хүнүн таварыштыр Тываныӊ Баштыӊы Владислав Ховалыг республиканыӊ чурттакчыларынга байыр чедирген.
«Хүндүлүг чаӊгыс чер чурттугларым, Делегейниӊ үндезин чоннарыныӊ делегей хүнү-биле силерге байыр чедирип тур мен! Бо байырлал биске чугула ужур-уткалыг болуп турар. Бистиӊ сорулгавыс дээрге ада-өгбелеривистен дамчып келген амыдыралчы чаӊчылдарывысты, бот-онзагай культуравысты, чүдүлге-сүзүк, сагыш-сеткил, мөзү-шынарныӊ үнелиг билиглерин кадагалап арттырып алыры. Шак ол чаагай ёзу-чаӊчылдар келир салгалдарныӊ чаа амыдыралы-биле хөөннежир болзун!
Бистиӊ Төрээн чуртувустуӊ байлак культуразын кадагалап арттырарынга дузалажып чоруур кижилерге улуү-биле өөрүп четтиргенимни бо байырлал хүнүнде илередип тур мен. Силер бүгүдеге быжыг кадыкшылды, менди-чаагай чорукту, аас-кежикти болгаш ажыл-ижиӊерге чедиишкиннерни күзедим!» - деп, Владислав Ховалыг блогунга бижээн.
Тываныӊ база бир онзагай культуралыг биче буурай чону ̶ ада-өгбелериниӊ төөгүзүн, культуразын кадагалап арттырып алган Тожу тывалары дээрзин ол демдеглээн.
Р. Демчик белеткээн.