Эрткен неделяда күрүне автоинспекциязының, приставтар албанының кады дежурныйлаашкынының түңнелинде ниитизи-биле 600 автомобильди хынааш, 78 хоойлу-дүрүм хажыдыкчыларын, 25 өрелиг кижилерни илереткен. Түңнелинде, 50 муң ажыг рубльди төледир аргалыг болган.
Аар, онза аар, назы четпээннерниң үүлгедиглери болгаш оларга удур кем-херек үүлгедиишкиннерин болдурбас сорулгалыг ведомстволар аразының комплекстиг планынга дүүштүр, Тес-Хем, Чөөн-Хемчик, Чаа-Хөл кожууннарда орук-патруль албанының постуларының ажылын катап тургускан.
Ук постулар май айда ажылдап эгелей берген. Оларның баазазынга хоойлу-дүрүм органнары Тываның Баштыңының даалгазы-биле рейдилерни чорудуп турар. Неделя санында чолаачыларны болгаш оларның транспортун калбаа-биле хынап турары эки түңнелдерлиг болуп турар.
Эрткен неделяда ИХЯ-ның ТР-де ОШАЧКИ ажылдакчылары орук дүрүмнериниң янзы-бүрү хажыдыышкыннарын кылганы дээш 78 административтиг протоколду тургускан, бир эзирик чолаачыны туткан, 2 автомобильди торгаалдыг черже тургускан.
Хыналда үезинде суд приставтары өрелиг кижилерниң баазазын дамчыштыр 25 кижини илереткеш, ол-ла черинге торгаалын төлеткен. Ол ышкаш 315 муң ажыг рубльге эт-хөреңги чарыгдалынга торгаалды онааган.
Шак ындыг кады ажылдажылга хоойлуга чөрүштүр арага садып-саарар чорукту болдурбазы-биле ажылдап турар органнарга база ажыктыг болган. Эрткен неделяда ТР-ниң Лицензия албанының, кожуун чагыргаларының болгаш полицияның специалистери 117 хыналда хемчеглерин кады чоруткан.
Түңнелинде, Кызыл, Ак-Довурак хоорайларның, Улуг-Хем, Кызыл, Чеди-Хөл, Чөөн-Хемчик, Бай-Тайга, Тес-Хем, Чаа-Хөл, Бии-Хем кожууннарның девискээрлеринге хоойлуга чөрүштүр арага аймаан садып турган 17 барымдааны илереткен. Ооң түңнелинде 1300 литр арага аймаан хавырган.
Бистиң корр.
Демниг ажылдың түңнели
5 июля 2023
37
Республиканың кожууннарында эрге-хоойлу органнарының төлээлери Тываның Баштыңы Владислав Ховалыгның даалгазы-биле катап тургустунган стационар постуларга хөй-ниитиниң чурумун камгалаар албан черлери-биле демниг ажылды организастаан.