Кожууннарда улуг назылыг Өгбелер төптери дайынчыларга ачы-дузалыг ажыл-ишти кылып турар.
Россияныӊ социал фондузунуӊ Тывада салбырыныӊ клиентилер-биле ажылдаар албаны улуг назылыг улуска хостуг үезин амыр-дыштыг эрттирип, ылаӊгыя ачы-буянныг чоруктар кылырынга ажыктыг төптерни тургускан.
Чөөн-Хемчикте Өгбелер төвү бо чыл дургузунда шериглерге чаштыр четкини хөйү-биле аргып турар. Ноябрь 24-те бистиӊ дайынчыларывысче 136 четкини чорудуп берген.
– Чаштыр четкиден аӊгыда, часпайн адар снайперлерниӊ хеп кырындан кедип алыр четкилерин база аргып турар бис. Бистиӊ пенсионерлеривистиӊ холу эптешкен, дыка дүрген аргыыр. Шалыпкын ажылдап турар – деп, Чөөн-Хемчик кожуунда төптүӊ куратору Наталья Ооржак чугаалаан.
Туран хоорайныӊ Бии-Хемниӊ Аныяктар төвүнде камгалал четкилер аргыыр аӊгы штаб тургускан. Улуг өгбелер, школачы-волонтёрлар, Баштайгылар шимчээшкининиӊ кожуунда салбырыныӊ кежигүннери аӊаа хүннүӊ-не кээп турар.
– Дайзынга билдирбейн, чаштып алырынга бо четкилер дузалаар, дайынчыларывысты камгалаар. Чаӊгыс илбек, чаӊгыс доӊ-даа кылырывыска, ниити ажыл-херекке үлүүвүстү кииргенивис болур. Мөӊгүн баштыг волонтёрларныӊ аныяк-чалыы уруглары-биле кады ажылдап турары өөрүнчүг-дүр – деп, Туранда төптүӊ куратору Любовь Алексеева демдеглээн.
Чаа-Хөл суурда өгбелер төвү өске кожууннарда эш-өөрүнге демнежип келген. Дооразы 7, узуну 3 метр чаштыр четкини олар аргып доозупкан.
– Бир дугаар кылган четкивис бо-дур. Ону кылырынга хөй материал болгаш хөй хол херек болду. Төптүӊ шупту кежигүннери-биле кады аргып турдувус. Ооӊ мурнунда балаклав – чүгле караа көстүр кылдыр кедип алыр муӊгаш бөрттер, рюкзактар даарап турдувус. 2024 чылдыӊ чазын 20 бөрттү, 20 рюкзакты аъш-чем-биле иштээш, дайынчыларже чоруткан бис – деп, чаа-хөлчүлерниӊ идепкейлиг төвүнүӊ удуртукчузу Мария Хомушку дыӊнаткан.
Кожууннарда Өгбелер төптериниӊ адрезин болгаш эрттирер хемчеглериниӊ расписаниезин РСФ-тиӊ регионалдыг салбырыныӊ сайтызындан көрүп ап болур.
Тывада Социал фондунуӊ салбырыныӊ медээлеринден Р. Демчик очулдурган.
«Шын» №93 2024 чылдың декабрь 4
