«Туризм болгаш хүндүлээчел чорук индустриязы» нацтөлевилел база ИПСЭР ачызында республиканың эштир черлерин чаагайжыдып, кемпингилерни тудуп база турисчи хүрээлеңни экижидер аргалыг болган. Чүгле эрткен чылын Тыва ол сорулгага 43 ажыг сая рубль федералдыг деткимчени алган.
Тускайлаан акша-хөреңгиге Национал паркта эштир черни чаагайжыдып турар. Туризм агентилелиниң дыңнадыы-биле алырга, эмнелге пунктулуг база дериг-херекселдер хөлезилээр черлиг административтиг оран-саваны тудуп, эштир черже элезинни сөөртүп, суг саартынар кабинкаларны база камгалакчылар бедигээжин тургузуп, чайгы кафени, видеохайгаарал база дыңнадыышкын системаларын кылып дооскан. Росхереглелхайгааралының сугга база элезинге хынаан лабораторлуг шинчилелдериниң харыызын манап турар.
Ол ышкаш Чагытай хөлде эштир чер ажыттынар. Солуттунар кабинкаларны, көжер арыгланыр черни, суг саартынар дөрт кабинканы, беш беседканы тудуп кылгаш, хемени саткан. Хөлдүң эриинде эмнелге пунктузун, модульдуг бажыңчыгашты, хөлезилел пунктузун, хайгаарал доскуулун тургускан. Эштип дыштанып келгеннерге 30 санныг чыдар болгаш хөлегеленир херекселдерни тургузуп, девискээрни долгандыр камгалаан.
Инвесторлар Азас хөлдүң эриинде чогуур ажылдарны кылып, эштиринге херек дериг-херекселдерни саткан. Эштир черни шинчилеп, дүвүн аштаан. Республиканың хереглекчилерниң хайгаарал төвү-биле анализтер алырынга керээни чарган. Июль 1-де пляж ажылдап эгелээр.
Тускайлап дериттинмээн черлерге эштири айыылдыг дээрзин сагындыраалыңар. Майның эгезинден бээр Тываның хемнер, хөлдер база сугларынга тос кижи дүшкен, оларның чедизи эзирик турган деп регионалдыг ОБЯ дыңнаткан. Сөөлгү таварылга — июнь 18-те Сарыг-Сепке 31 харлыг аныяк кижи сугга дүжүп, чок болган.
А. МОНГУШ.
“Шын” №48 2024 чылдың июнь 29