Бо чылын журналистер болгаш массалыг информация чепсектериниң аразынга мөөрейни дөрт номинацияга эрттирген, ында медиа-төлевилел бүрүзү 400 муң рубль чедир деткимчени ап болур турган. Мөөрейже ниитизи-биле 11 билдириишкин кирген. Мөөрей комиссиязы эң эки беш төлевилелди шилээн.
«Ажылчын мергежилдерни нептередир эң эки медиа-төлевилел» деп номинацияга «Твой информ» солунга «Ажылчын бе? Эки-дир! – Чурт ажылчын чондан үндезилеттинген» деп төлевилели-биле Луиза Первушина тиилекчи болган. Каңнакчылар, электриктер, тудугжулар дээн ышкаш ажылчын мергежилдерниң төлээлериниң дугайында статьялар, ол ышкаш Тывада күш-ажыл рыногунда амгы үеде тургустунуп турар айтырыгларга хамаарышкан чүүлдер үндүрери планаттынган.
Сайзана Донгак “Хамааты чаңгыс демни быжыглаар эң эки медиа-төлевилел” деп номинацияга шылгараан. Ол “Тыва. Чүректиң кыйгырыы-биле” деп төлевилелинде регионнуң хөгжүлдезинге үлүг-хуузун киирген кижилерни чырыткан.
“Патриотчу кижизидилге болгаш төөгүлүг сактыышкынны кадагалап арттырары” деп категорияга Наталья Мохова “Азияның үнү” радиога “Шынчы төөгүлер: эрес-дидим чорук дээш төрүттүнген” деп төлевилелинде Тываның шылгараңгай чурттакчыларынга тураскааткан, оларның ажыл-херээ болгаш Төрээн чуртунга киирген ачы-дузазынче хөй-ниитиниң кичээнгейин угландырып турар.
Ада-чурттуң Улуг дайынынга Тиилелгениң 80 чыл оюнга тураскааткан номинацияга «Тиилелгениң дириг төөгүзү: Тыва болгаш ооң маадырлары» деп төлевилел-биле Денис Денисов база «Тувинец» сеткүүлге «Эрткен үениң чуруктары» деп бөлүк-биле Роланда Сандан тиилээннер. Ол ийи төлевилел дайын дугайында сактыышкынны болгаш республиканың чурттакчыларының Улуг Тиилелгеже киирген үлүг-хуузун мөңгежидеринче угланган.
Бистиң корр.
Чурукту Chad Al нейросетьтен алган.
“Шын” №25 2025 чылдың июль 3