Тыва Республиканыӊ Чазааныӊ чанында Тываныӊ гуманитарлыг болгаш социал-экономиктиг тускай шинчилелдер институдунга «Дхарма-Дарыма» деп очулга тѳвүн ажытканын институт дыңнаткан. Ук хемчегни институттуӊ чогаал шинчилээр секторунуӊ эртем ажылдакчылары удуртуп эрттирген.
Очулга тѳвүнүӊ ажыдыышкынынга институттуӊ директору Вячеслав Март-оол, директорнуӊ эртем талазы-биле оралакчызы Уран Донгак, социал-экономиктиг тускай шинчилелдер талазы-биле оралакчызы Оттук Иргит киришкеннер. База ол ышкаш, геше Цүлтим Таи башкы болгаш эмчи лама Аян-оол Херел-оол башкы хемчегниӊ хүндүлүг аалчылары болганнар.
Лама башкылар амгы үеде очулга ажылыныӊ ниитилелге чугула херек апарганын чугаалап тура, чаа ажыттынып турар тѳптүӊ ажыл-чорудулгазын улуг ѳѳрүшкү-биле деткээн. Оон аӊгыда, чылыг-чаагай йѳрээлдерни салып, чаа ажыттынып турар тѳптү арамайлап бергени, хемчегниӊ кол кезээ болган.
Чалаткан лама башкылар-биле институттуң ажылдакчылары очулга төвүнүң доктаал-саавыры-биле таныжып тура, чаа төптүң ажыл-чорудулгазының дугайында чугааны кылганнар. Чугааның түңнелинде чаа ажыттынган очулга төвү база “Ногаан Дарийги” хүрээзи кады ажыл-чорудулганы эгелээр болган.
Институттуң директору В.Д. Март-оол чаа эгелээшкинни деткип, күрүне чергелиг деткимче мөөрейлеринге (грантыларже) киржирин сүмелээн. Ооң саналын төптүң кежигүннери чөптүү-биле хүлээп алган. Келир чылын болур деткимче мөөрейинче белеткел ажылдарын эгелей бергенин дыңнатканнар.
Төптүң кол сорулгазы – шажынның номнарын болгаш өөредиглерин тыва дылче очулдургаш, чонга чедирери. Ооӊ-биле чергелештир тыва дылды сайзырадырынче угланган. Ылаңгыя чүдүкчү чонга ук ажылдар чугула херек дээрзин социал четкилерде байдал бадыткап турар.
«Тывамедиабөлүктүң» медээлеринден.
«Шын» №79 2024 чылдың октябрь 16
