Красноярск хоорайга ноябрь 9–10 хүннеринде Россияда спорттуң чаа тургустунган бир хеви- ри – агаар гимнастиказынга “Дээрниң чырыткызы” деп бүгү Россия чергелиг маргылдаа болган. Аңаа аңгы-аңгы хоорайлардан 6–13 харлыг 250 дидим чүректиг бичии уруглар киришкен. Бистиң республикадан тренер башкы Ника Монгуштуң белеткээни 14 уруг төлептиг киришкеш, шупту шаңналдыг, медальдарлыг чанып келгени чаңгыс чер чурттугларынга улуг өөрүшкү, чоргаарал болган.
Бистиң республикада Агаар гимнастиказының чөвүлели каш-ла чыл бурунгаар (2022 чылдың ноябрь 21-де) тургустунган-даа болза, уруглар 2023–2024 чылдарда хөй-хөй маргылдааларга киришкеш, шаңнал-макталдарны чаалап алган дээрзин тренер башкы Ника Валерьевна демдеглээн: “Амдыызында бистиң уруглар агаар гимнастиказының 2 хевиринде — пөс хендирге база дээрбекке чараш оюн-көргүзүглерин чедиишкинниг күүседип турар”.
Бо маргылдаага уруглар сүрээдеп, коргуп-даа турза, эштери дээш кызып, өөренип алган шимчээшкиннерин дидим, частырыг чокка күүсеткеш, тиилээш, ада-иелеринге улуг белекти сөңнээннер. Тергиин шаңналга Амина Кашпык-оол (6–7 хар, пөс хендирге), Арина Ооржак (10–11 хар, дээрбек), Падми Самбуу (10–11 хар, дээрбек), Ай-Хээ Куулар (6–7 хар, пөс хендир), Даяна Хертек (12–13 хар, пөс хендир), Айыраан Хертек (8–9 хар, дээрбек), София Монгуш (12–13 хар, дээрбек) төлептиг болганнар.
Мөңгүн медальдарны Ханды Күжүгет (6–7 хар, пөс хендирге), Аэлита Кыргыс (10–11 хар, пөс хендирге) алганнар. Хүлер медальдарга Онзагай Натпит-оол (8–9 хар, пөс хендирге). Милана Ооржак (10–11 хар, пөс хендирге), Арина Жибинова (12–13 хар, пөс хендирге), Ия Ламажай (12–13 хар, пөс хендирге), Виктория Ооржак (12–13 хар, дээрбек) төлептиг болганнар.
Ника Монгуш цирк талазы-биле дээди эртемниг башкы. Ол сонуургалдыг спорчуларны агаар гимнастиказының тренер башкызынга өөредип база улаштыр профессионал тренер штавын тургузуп, спорттуң бо хевирин республика иштинге сайзырадыр күзелдиг. Ынчангаш бичии спортчу кыстарга болгаш тренер башкызынга бедик спортчу чедиишкиннерни база бодап чоруур күзелдери боттанырын күзеп каалы.
Алексей ЧАМБАЛ-ООЛ, спорттуң хоочуну.
“Шын” №88 2024 чылдың ноябрь 16
