Даш чонукчуларының байырлалын уткуштур хүндүлүг мастеривиске байыр чедирип шыдавас болганывыска хараадап, мону бижидивис.
Тываның массалыг информация чепсектериниң ажылдакчыларының аразынга чылдың болур республика чергелиг “Чонар-даштан бийир” мөөрейниң кол шаңналы – делегейде ховар дирткен чонар-даштан сиилбип кылган бийир болуп келген. Хөй чылдарда журналистика адырында ажылдап чоруур хоочуннар-даа, чаа эгелеп чоруур аныяк журналистер-даа шак ол чонар-даштан бийирни чаалап алгаш, күрүне шаңналы алганы-биле дөмей үнелээр ийик бис. Чүге дээрге профессионал деңнелди үнелээн мөөрейге киришкен журналистерниң аразындан чүгле тергииннери ол бийирге төлептиг болуп келген.
Мөөрей 19 чыл уламчылаан. Чаалап алган бийирин чогум кым сиилбип белеткеп турганын билир улус журналистер аразында эвээш дизе, частырыг болбас. Ол чараш бийирлерни ТЖЭ-ниң чагыы ёзугаар сөөлгү чылдарда Россияның болгаш Тываның Чурукчулар эвилелиниң кежигүнү, “ТР-ниң алдарлыг даш чонукчузу” хүндүлүг аттың бир дугаар эдилекчизи Егор Дойнакай кылып турган.
Ховар салым-чаяанныг даш чонукчузунуң бо чайын, август 29-та, үр эвес аарааш, чырык өртемчейден чарлып чорутканының дугайында медээ биске, Тываның журналистер эвилелинге, дыка улуг согуг, ууттунмас чидириг болду.
Ховар мастерниң холунуң үжүү–чонар-даштан бийирлеривис, катаптаттынмас үнелиг шаңнал болуп артар.
Карина МОНГУШ.
Чуруктарны ТЖЭ-ниң архивинден алган.
“Шын” №36 2025 чылдың сентябрь 18Показать список поделившихся
