ТР-ниң Баштыңы Владислав Ховалыгның саналы-биле «Ареал» компаниязы Тожу кожууннуң төвү Доора-Хем сумузунда ниити шөлү 850 дөрбелчин метр спорт залын тудуп дооскан.
Ол Тожу кожуунда эң-не улуг оран-сава болган. Аңаа мини-футбол, хол бөмбүү, баскетбол болгаш хүрештиң аңгы-аңгы хевирлерин ойнап болур. Бичии уруглар-даа, улуглар-даа база тус черниң спортчу школазының кижизиттирикчилери-даа ойнап болур. Оон ыңай кожуун чергелиг маргылдааларны база аңаа эрттирип болуру онза.
Спортчу комплексте чунар кабинкаларлыг солуттунар өрээлдер болгаш тренерниң кабинеди база дериг-херекселдер сугар тускай өрээл бар. Чылыгны хандырары-биле модульдуг котельнаяны салган, а сугну бот-тускайлаң скважина хандырып турар.
«Тываның социал-экономиктиг хөгжүлдезинге киржилгевис дээш өөрүп тур бис. Доора-Хемде туттунган спортчу зал республикага «Ареал» компаниязының тудуп бергени ийи дугаар улуг оран-савазы болуп турар. 2025 чылда ындыг хевирлиг спорт залды Эрзин кожууннуң төвүнге туткан бис. Оон аңгыда Тываның өске-даа сумуларынга биче хемчээлдиг спорт залдарны тудуп турар бис. Ол ажылывысты ам-даа уламчылаар бис» – деп, «Ареал» компаниязының чиңгине директору Владислав Свиблов чугаалаан.
Ыраккы Доора-Хемде 3 муң ажыг кижи чурттап чоруур. Бо хүннерге чедир Доора-Хемге чылдың дөрт эргилдезинде ойнаар спорт залы турбаан дээрзин сагындыраал.
«Ареал» дээрге Сибирьде, Россияның Ыраккы Чөөн чүгүнде болгаш Арктикада өңнүг, ховар болгаш үнелиг металлдарның чыдыннарын дилеп-тывар Россияның даг-болбаазырадылга болгаш металлургия компаниязы-дыр. Забайкальеде, Камчаткада болгаш Хабаровск девискээрлеринде, Бурят Республикада база Чукот автономнуг округта кол бүдүрүлге төптери мөөңнеттинген. Компанияда 16 муң ажыг хамаатылар ажылда хаара туттунган.
/ Бистиң корр.
Чурукту болгаш медээни «Ареал» компаниязының парлалга албанындан алган.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn