Тожу кожууннуӊ төвү Доора-Хем суурнуӊ тургустунганындан бээр 130 чыл оюн демдеглеп турар. Республиканыӊ ырак кожуунунуӊ чурттакчыларынга Тываныӊ Баштыӊы Владислав Ховалыг байырын чедирген:
«Тожуга барбаан кижи Тываны көрбээн болур дижири анаа эвес болгай. Доора-Хем суурнуӊ 130 чылдааны-биле Тожу чонунга сеткилимден байыр чедирип тур мен. Чаӊгыс чер чурттугларым дизельдиг электрогенерацияныӊ бүгү чедимчелиг эвес талазын шыдажып эртип чоруур дээрзин билир мен. Кожуунга төпчүткен электри хандырылгазын шалыпкын чорударыныӊ дугайында федералдыг коллегаларымга ужуражылга үезинде чугааладым. Келир үеде электрилиг энергия дамчыдар шугумнуӊ чүс ажыг чагыларын Тожу участогунда тургускан, а Ырбан суурда подстанцияныӊ төлевилелинге хамаарыштыр күрүне экспертизазын кылып турар.
Кожууннуӊ девискээринде чеди муӊ хире кижи амыдырап-чурттап турар. Оларныӊ чамдыызы мал-маган азырап өстүрүп чоруур. Чижээ, кожуунда 3,5 муӊ бода мал бар. Тожунуӊ агаар-бойдузун барымдаалап көөр болза, ол эки көргүзүг. Улустуӊ хөй кезии аӊныыр ажыл-агыйын кылып турар. Кожуун төвүнде балык аймаан болбаазырадыр талазы-биле амгы үениӊ цегин ажыдып шыдааннар. Кадыг-дошкун агаар-бойдустуг черге дадыккан, шыдамык аажы-чаӊныг болгаш сайгарлып билир улус, кажан электри дамчыдар шугумну кылыптарывыска, чаа-чаа арга-хорганы тып алыр дээрзинге бүзүрээр мен».
Бүгү делегейде онзагай деп санадып келген ивижилерниӊ, тожу-тываларыныӊ культуразын кадагалап арттырар. Шалыпкын хөгжүлделиг индустриализация үезинде бойдусту камнап хумагалаар болгаш чоннуӊ чаӊчылчаан ажыл-агыйын сайзырадыры чугула дээрзин регионнуӊ удуртукчузу Владислав Ховалыг онза демдеглээн.
ТР-ниң Чазааның медээлеринден Р. ДЕМЧИК белеткээн.
«Шын» №74 2023 чылдың сентябрь 30
