ТР-ниң күш-ажыл болгаш социал политика сайыды Эдуард Сандан:
– Бистиң Президентивис бо удаада база чуртта болуп турар бүгү болуушкуннар, ажыл-агыйның бүгү адырларынга хамаарышкан айтырыгларны тергиин эки билип турарын көргүстү. Дорт эфирге 2 сая ажыг айтырыглар чондан киргенин баш бурунгаар дыңнаткан. Оларның хөй кезии социал айтырыглар дээрзи билдингир. Президент Валадимир Путин база катап өг-бүле – ниитилелдиң кол өзээ дээрзин колдадыр демдегледи. Бүгү эрге-чагырга органнарының кол күжениишкинниг ажылы өг-бүлени деткииринче угланган болурун чугаалады. 2026 чылдың январь 1-ден эгелеп 2-ден хөй ажы-төлдүг өг-бүлелер чыл дургузунда үндүрүг дадывырынче киирген акшазының 7 хуузун катап эгидип алыр аргалыг дээрзин дыңнатты. Ол дыка улуг деткимче-дир.
Россияның Маадыры, ТР-ниң аныяктар херектериниң талазы-биле сайыды Буян Куулар:
— Владимир Путин дорт эфирге тускай шериг операциязының киржикчилерин деткиири-биле тургускан “Маадырларның үези” федералдыг программа ёзугаар ооң киржикчилери Россияның аңгы-аңгы булуңнарында удуртур албан-дужаалдарда ажылдап эгелээнин дыңнатты. РФ-тиң Президентизиниң Администрациязында бир ТШО киржикчизи ажылдай берген болду, бир кижи губернатор кылдыр томуйлатканын Владимир Путин чугаалады.
Бистиң регионга хамаарыштыр чугаалаар болза, ТР-ниң Чазак Баштыңы Владислав Ховалыгның деткимчези-биле ук программага үндезилээн “Тываның маадырлары” деп программаны боттандырып турар. Чоокта чаа бодунуң дужаалы-биле мени ТР-ниң аныяктар херектериниң талазы-биле сайыдынга томуйлады. Ол-ла программа-биле мээң-биле кады өөренип турар ТШО киржикчизи Иван Монгуш чоокта чаа ТР-ниң Лицензия бээр албанның удуртукчузунуң оралакчызынга томуйлаткан.
Кандыг-даа удуртур албан-дужаалга ажылдай бээр болзувусса, ТШО-га кады чораан дайынчы эш-өөрүвүстүң нарын айтырыгларын шиитпирлежиринге дуза кадары, оларның өг-бүлелеринче кичээнгейни хаара тудуп деткиири, ТШО-дан чанып келген дайынчыларны ажыл-агыйга тургустунарынга боттуг дуза көргүзери бирги чергениң шиитпирлээр айтырыглары дээрзин билир бис. Республиканың аныяктары келир үеде Тываны сайзырадырынче угланган ажыл-агыйын улам хөгжүдеринче углап, демниг ажылдаар болзувусса, чуртувус сайзыраар дээрзинге бүзүрээр мен.
Бистиң корр.
“Шын” №50 2025 чылдың декабрь 25