Декабрь 11-де Тываның Баштыңы Владислав Ховалыг-биле болган дорт дамчыдылгага хамаарыштыр удуртукчуларның бодалдары-биле үлежир-дир бис.
ТР-ниң Дээди Хурал Даргазы Каң-оол Даваа:
– Тываның Баштыңы Владислав Товарищтайович Ховалыг дорт дамчыдылга үезинде чурттакчыларның чидиг айтырыгларынга харыылаанындан аңгыда, келир чылдарда кол сорулгаларны айыткан. Национал төлевилелдерниң болгаш федералдыг программаларның тодаргай болгаш үезинде күүселдези кол угланыышкыннарның бирээзи болур.
Дараазында беш чыл дургузунда кадык камгалалынга хамааржыр 370 ажыг объектилерниң чаагайжыдылгазы, тудуу, чаартылгазы планда көрдүнген. Ниитизи-биле 40 ажыг миллиард рубль ол объектилерже көрдүнген. Салган сорулгалар берге-даа болза, ону чедип алыры барыктыг.
Дээди Хурал хоойлужудулга органы болганда, ол төлевилелдерге эрге-хоойлу талазы-биле чедимчелиг деткимчени хандырары – оларның кол сорулгаларының бирээзи деп санап турар. Чүге дээрге ук ажылдың чедиишкинниг болуру республикада бар эрге-чагыргаларның шупту адырларының демниг болгаш күжениишкинниг ажылының түңнели болур ужурлуг.
ТР-ниң саң-хөө сайыды Орлан Достай:
– Тываның Баштыңы-биле болган дорт дамчыдылга үезинде чоннуң салган айтырыгларының доозазы-биле танышкаш, акша-шалыңны үе-шаанда төлээриниң болгаш ооң 2026 чылдың январь 1-ден тура өзериниң дугайында айтырыгга доктаадым.
Тыва Республиканың Саң-хөө яамызы декабрь 9-туң хүнүнден тура шалыңнарны төлээри-биле ону эгелей берген дээрзин база акша-хөреңгини чогуур албан черлериниң агар санынче шилчиткен дээрзин дыңнадып тур мен.
Амгы үеде албан черлери ажылчыннарының агар санынче шалыңны шилчидипкен. Ажылчын чоннуң акша-шалыңы үе-шаанда агар санынче кирип турар болзун дээш, бүгү күжүвүстү үндүрүп ажылдап турар бис.
2026 чылдың январь 1-ден эгелеп чамдык улустуң ортумак шалыңы айда 7,6 хуу өскеш, 60764 рубль чеде бээр, а эң эвээш шалың 42636 рубльден 51477 рубль чедир 21 хуу өзер.
2026 чылда Тыва Республикада эң эвээш шалың 2023 чылга деңнээрге, 77 хуу азы 22447 рубльге (29030 рубльден 51477 рубльге чедир) өскен, чамдык ажылчыннарның ай санында ортумак шалыңы 42 хуу азы 17877 рубль чедир өскен.
РФ-тиң Күрүне Думазының депутады Айдың Сарыглар:
– Национал төлевилелдерниң болгаш федералдыг программаларның шынарлыг болгаш үезинде күүселдези кол угланыышкыннарның бирээзи болур. Тыва инвестицияларны идепкейлиг хаара тудар, улуг төлевилелдерниң боттаныр чери апарган. Республика чаа чадаже үнүп, ийи чаа мурнады хөгжүдер ужурлуг төлевилел-биле ажылдап эгелээн. Ол дээрге Тастыгда литий, а Ак-Сугда чес шыгжамырлары-дыр. Ук төлевилелдерни күрүне корпорациязы «Ростех» деткип турар.
Кызыл хоорайга үш сылдыстыг гостиница комплекизиниң тудуу база бо чылын эгелээр ужурлуг. Ооң инвестору «Космос Отель Групп» ААН-биле керээ чардынган. Бо төлевилел республиканың найысылалының турисчи инфраструктуразын хөгжүдеринге база бизнестиң сайзыралынга чугула базым болур.
РФ-тиң Федерация Чөвүлелинде Тывадан сенатор Шолбан Күжүгет:
– Республиканың чурттакчыларының киирген айтырыгларының ачызында дорт дамчыдылга ажыктыг болгаш сонуурганчыг болган. Бо чүгле айтырыглар эвес, а кижилерге чүү чугула дээрзин тодарадыр чугула арга-дыр. Харылзааның бо хевири ниитилелдиң хереглелдериниң айтырыгларын шын шиитпирлээринге дузалаар.
Дорт дамчыдылга үезинде 30 ажыг теманы сайгарган. Ниитизи-биле 600 ажыг айтырыг бар болган. Социал четкилер таварыштыр база хөй санныг айтырыглар кирген. Айтырыг бүрүзү харыы чок артпас дээрзи билдингир.
Айдың ОНДАР белеткээн.
Чурукту интернеттен хоолгалаан.
“Шын” №49 2025 чылдың декабрь 18