Тываның Баштыңы бодунуң чаңчылчаан дорт шугумун чылдың баш бурунгаар түңнелдери-биле холбаштырып эде хевирлээр дугайында шиитпирин чарлаан.
Ноябрь 12-де планнаан дорт шугумну 2025 чылдың түңнелдерин чугаалажыр кылдыр декабрь айже чылдырганын сагындыраал.
«Чиге айтырыгларга чүгле харыылаар эвес, а оларның тургустунуп келген чылдагаанын база ону шиитпирлээр дээн ажыл-херектеривисти тайылбырлаары чугула. «Россия 24» телеканалдың деткимчези-биле декабрьда дорт дамчыдылга үезинде ужуражыр бис» — деп, Тываның Баштыңы бодунуң блогунда демдеглээн.
Владислав Ховалыг-биле дорт шугумче айтырыглар чыылдазы тускай сервистер таварыштыр чоруп турар:
- Күрүне ачы-дуза порталында дараазында айтыгда удур харылзаа шөлү: (pos.gosuslugi.ru/lkp/direct...)
- Дараазында чат-ботта – (forms.yandex.ru/u/68feecd7...)
Регионалдыг удуртулга төвүнүң медээзи-биле алырга, эрткен чылда ышкаш транспорт инфраструктуразының хөгжүлдезинге хамааржыр айтырыглар хөй. Регионнуң чурттакчылары чүгле Кызылдың агломерациязында эвес, а ыраккы девискээрлерде орук септелгезиниң болгаш чаартылгазының ажылдарын демдеглеп, чамдык кожууннарда орук четкизиниң чаартылгазын дараазында чадаларже киирерин сонуургап турарлар. Тудуг адырында шиитпирлээр элээн айтырыглар база кирген.
Чурттакчы чоннуң чамдык айтырыгларынга дарый шиитпирлер негеттинип турарындан республика Баштыңы чогуур даалгаларны берген.
«Кирген санал-оналдарга, чижээ, мооң адаанда бижиктерге Чазак кежигүннери-биле кады дарый харыылап турарывысты эскерген боор силер. Бо ажылды ам-даа уламчылап, доктаамал чорудар бис» – деп, Владислав Ховалыг демдеглээн.
Тываның Баштыңы эрткен чылдың түңнелдерин сайгарары-биле декабрьда дорт шугумну эрттирер.
Чурукту ТР-ниң Чазааның парлалга албанындан алган.
“Шын” №44 2025 чылдың ноябрь 13