Тыва Республикада ортумак профессионал өөредилге черлеринче (ОПӨ) дужаап кирер кампания 2025 чылдың июнь 20-де эгелээн. Ажылчын мергежилдерге өөренир сонуургал улгадып, күш-ажыл рыногунда колледж болгаш техникум доозукчуларынга хереглел улгаткан.
Ортумак тускай өөредилге черлеринче дужаап кирер билдириишкиннер санының өскени ону бадыткап турар. ТР-ниң Өөредилге яамызының дыңнатканы-биле алырга, июль төнчүзүнге чедир кирген билдириишкиннерниң ниити саны 12700 четкен, эрткен чылга деңнээрге, 1500 кижи хөй. Оларның аразындан 5 муң хире билдириишкин 9-ку класстың доозукчуларындан болза, 11-ги класстың доозукчуларындан 1600 ажыг билдириишкин кирген. Ниити билдириишкиннерниң санындан 4700 хирези бюджеттиг олуттарже, 1750 хирези коммерциялыг черлерже дужааган.
Эмчи, тудуг болгаш электри монтаж мергежилдери – келир үениң студентилериниң аразында эң-не нептереңгей угланыышкыннар. Оон аңгыда IT база программа чогаадыр угланыышкын хереглелдиин бадыткаан. Өөредилге черинче дужаар документилерин боду азы почта таварыштыр киирип болурун ведомство тайылбырлаан. Ооң-биле чергелештир чогуур документилерни дужаарынга Күрүне ачы-дузазының чаңгыс аай порталын ажыглап турар абитуриентилер саны көвүдеп турар. Ол күрүне ачы-дузазын «Ортумак профессионал өөредилге программаларынче өөренип кирери» деп адаар. Бо хүнге чедир алды муң ажыг кижи ону ажыглаан.
Техникумнар болгаш колледжтерже документилерни 2025 чылдың август 15-ке чедир, а чогаадыкчы мергежилдерже — 2025 чылдың август 10-га чедир хүлээр.
Бистиң корр.
Чурукту интернет четкизинден хоолгалаан.
“Шын” № 30 2025 чылдың август 7