Апрель 11-де республиканың К.И. Чуковский аттыг уругларның ном саңының чурт-шинчилел болгаш чогаал килдизинге салым-чаяанныг, сураглыг хөгжүмчү, композитор, Тыва Республиканың болгаш Таңды кожууннуң культуразының алдарлыг ажылдакчызы, Россияның Композиторлар эвилелиниң кежигүнү Сергей Бадырааныӊ 75 харлаан оюнга база эртемден, шинчилекчи, этнограф, төөгү эртемнериниң доктору, Тываның Дээди хамы, Тываның улустуң чогаалчызы, «Делегейниң дириг эртинези» деп бүгү делегейде хүндүлүг аттың эдилекчизи Монгуш Кенин-Лопсанның мугур 100 харлаан оюнга тураскаадып «Дыӊгылдайлаан ырыларныӊ сөӊнекчизи» деп чогаадыкчы ужуражылганы эрттирген.
Хемчегниң кол маадыры композитор Сергей Иванович-биле Кызылдың 12 дугаар школазының 6 «а» клазының өөреникчилери ужурашкан.
Удуртукчу башкы Чинчи Ооржак бичии уругларның уран чүүлге база номчуттунарынга сонуургалын оттуруп, бичии чаштарга хөй-хөй ырыларны бижип чоруур композиторувусту таныштырып, солун ужуражылга-хемчегни удуртуп, чедип келген.
Хүндүлүг аалчы Сергей Иванович бодунуң чаш чораан үелерин, амыдырал-чуртталгазын болгаш амгы үеде кылып турар ажыл-чорудулгазының дугайында, кажан, канчап ыры бижип эгелээнин төөгүп, оон-даа өске солун, уттундурбас төөгүлерин чугаалап, К.И. Чуковский аттыг уругларның ном саңының ажылын бедик үнелеп, өөрүп четтиргенин илеретпишаан «Хамнаарак» база «Угулза» деп 2 номун белекке сөңнээн.
Аалчывыс, композитор С.И. Бадырааның «Хамнаарак» деп уругларга бижиттинген чыынды ырыларындан бичии болгаш элээди уругларга М.Б. Кенин-Лопсанның «Чөрүү сен» база «Дүңгүрнүң ырызы» деп бөлүк шүлүктерден бижиттинген «Чеди-Хаан», «Дидир-дидир», «Халак-халак» деп ырларныӊ хөгжүм үделгези-биле өөреникчилер биле чурт-шинчилел болгаш чогаал килдизиниң кол библиотекары ϴнермаа Куулар кады ырлажып, күүсеткеннер.
Ном саңынче билдингир композиторувус С.И. Бадырааны чалаанывыс уругларга солун болгаш өөредиглиг болганын келген аалчылар демдеглээн. Ужуражылга соонда, улуг композитор-биле төөгүлүг чуруктарга тырттырышканнар.
ϴнермаа КУУЛАР, К.И. Чуковский аттыг уругларның ном саңыныӊ чурт-шинчилел болгаш чогаал килдизиниӊ кол библиотекары.
Чуруктарны авторнуң архивинден алган.
“Шын” №14 2025 чылдың апрель 17
