Кышкы дыштанылга үезинде республиканың уругларының ортузунга кемдээшкиннерни болгаш айыыл чок чоруктарны болдурбазы чугула.
Ынчангаш уругларның болгаш элээдилерниң комплекстиг айыыл чок чоруун хандырары-биле декабрь айда бүгү школаларга ада-иелерниң класс хуралдарын, ада-иелерниң айыыл чок чорук талазы-биле инструктажтарны эрттирип турар. Мооң-биле чергелештир кышкы үеде айыыл чок чорукка хамаарышкан янзы-бүрү хемчеглерни, мөөрейлерни, викториналарны база организастап турар.
Кышкы үеде бичии-даа сула салдынган ажыы чок. Чүге дизе ада-иези ажылдап чоруй барганда, школа амыдыралындан хостуг дыштанылга үезинде олар бажың-балгатты ээлеп артып каарлар. Ынчангаш оларның мурнунда харыысалга улгадыр – амы-тынның, кадыкшылдың, өнчүнүң кадагалалы дээш.
Амгы үеде бажың бүрүзү электри-биле ажылдаар дериг-херекселдерни ажыглап турар. Ындыг болганда ол херекселдерниң айыыл чок ажыглалы-биле холбашкан чугааны, тайылбырны колдадыры чугула. Электри четкизинче коштунган үрелик херекселдерниң амы-тынга айыылдыының дугайында чугааны уруглар-биле үргүлчү чорудар ужурлуг бис. Чогум-на үрелик дериг-херекселдер өрт айыылын болдуруп, амы-тынга чедирип болур. Өрттерниң 10 хуудан 15 хуу чедир таварылгалары уругларның от-биле оваарымча чок болганындан, ол ышкаш улуг кижилерниң тенектенген уругларны чагып-сургавайн, кыдыындан тоомча чок эртип турарындан болуп турарын статистика бадыткап турар.
Дыштанылга үезинде албан сагыыр эң бөдүүн ниити дүрүмнер:
Сереңгини уруглар чедип шыдавас черге шыгжаар;
Садыг четкизиниң ажылдакчылары уругларга от-сереңги, зажигалка, таакпы, пиротехника садып болбас;
Уругларны чааскаандырзын бажың-балгатка шоочалап болбас;
Одап каан суугуну азы чылыдар херекселдерни уругларга хайгаарадып болбас;
Назы четпээн уруглар электри-биле ажылдаар чылыдылга херекселдерин, газ-биле ажылдаар суугуларны кыпсып болбас.
/ Бистиң корр.
Чурукту интернеттен хоолгалаан.
“Шын” №50 2025 чылдың декабрь 25