Чайның чылыг кыска үезиниң дургузунда уругларның кадыкшылын узун соок кышка удур дадыктырып алыр сорулга-биле чайгы дыштанылга лагерьлериниң белеткел ажылы кидин түлүк.
2022-2023 өөредилге чылында 7-ден 17 харга чедир уругларның ниити саны 72540 кижи. 2023 чылдың чайгы дыштанылга үезинде Тываның Чазаа 33 840 кижини азы 47,5 хуу уругларны дыштандырарын планнап турар.
2023 чылда чайын 166 лагерь болгаш 178 түр үениң дыштанылга төвү бадылаан план ёзугаар ажылдаар. Ниитизи-биле 33480 уруг кадыкшылын быжыглап, дыштаныр. Бо чылын кадыкшылга кампаниязынга 3 муң ажыг ажылчын киржир.
Ол ышкаш ТывКУ-биле “Лагерьлерже – студотрядтарны” деп төлевилелди боттандырар. Хүндүскү лагерьлерге 35, стационар лагерьлерге 48 сургуулду хаара тудары көрдүнген.
/А. ДОНГАК
