2022 чылдың сентябрь 5-те, 16.00 шакта ТР-ниң өөредилге сайыды Алексей Храмцов-биле «Тыва Республикада чаа өөредилге чылының эгези» деп дорт эфирге ужуражылга болган.
Аңаа Тываның школаларында каш уруг өөренип киргенин, бирги классчыларның санын, башкыларның чедишпезин, Кызыл хоорайның школаларында уруглар санының көвейин, көдээ черлерниң школаларының чидиг айтырыглары дээш өөредилге адырынга хамаарышкан айтырыгларның доозазын чугаалашкан.
Бо хүннерде чонну дүвүредип турар чидиг айтырыгларның бирээзи – чамдык школаларда капиталдыг септелге айтырыы. Социал четкилерде капиталдыг септелгези ам-даа доозулбаан школалар дугайында изиг-изиг чугаалар чоруп турарын билир бис.
ТР-ниң өөредилге сайыды Алексей Храмцовтуң ук айтырыгга хамаарыштыр тайылбыры:
– 2022 чылда Тываның 26 школазынга капиталдыг септелгени эгелээн бис. Кандыг-даа ажылды сегирип алырга, кыдыындан шүгүмчүлексээр улус черле тыптып кээр. Бо удаада база ындыг хамаатылар бары хомуданчыг-дыр. Кым-даа чиде бербээн, чүү-даа үрелбээн, кандыг-даа болуушкун болу бербээн – ажыл план езугаар уламчылап турар. РФ-тиң Чырыдыышкын яамызы-биле чарып алган дугуржулгавыс бар. Ында 2023 чылдың төнчүзүнге чедир Тываның 26 школазынга капиталдыг септелге доозулган турар деп айыткан.
Сентябрь 1-ге чедир доозар деп бодувустуң күзеливис-тир ийин. Бо хүнде 26 школаның 5-ниң септелгези доозулбаан. Сентябрь төнчүзүнге чедир 4 школаның септелгези доосту бээр. А Шагаан-Арыгның 2 дугаар школазының септелгези бичии саадаар. Красноярск крайга өөредилге эргелелинге ажылдап чораан дуржулгамдан алырга, Шагаан-Арыгның 2 дугаар школазы ышкаш шак-ла ындыг септелге херек школаларның септелгезинге, эң-не эвээш дизе, 12 ай негеттинер чорду. Үе биле шынарны будавас болза эки. Септелгени кылыр тускай негелделер бар деп сагындыраал.
Уругларга аңгы-аңгы черлерге өөренири амыр эвес болбайн канчаар. Ада-иелерни-даа, уругларны-даа кончуг эки билип тур мен. Ынчалза-даа шыдашканның түңнелинде, шынарлыг кылдыр септээн школалыг болуру чүүден эки.
Айдың ОНДАР.