Россияның девискээри Курск областче Украинаның чепсектиг күштери август 6-да халдаан, ооң кезик-чамдыызын ээлеп алган соонда Президент Владимир Путин Курск областың чурттакчыларынга гуманитарлыг дузаламчыны организастаар даалганы РФ-тиң регионнарының удуртукчуларынга берген. Россияның өске регионнары-биле деңге Курск областың чурттакчыларынга дузаламчыны көргүзеринге, өске девискээрлерже чайладыр көжүрген российжи хамаатыларны хүлээп алырынга республика беленин Тываның Баштыңы Владислав Ховалыг дыңнаткан.
Тываның чурттакчы чонунуң болгаш хөй-ниити организацияларының чыгганы аъш-чем, идик-хеп дээш хүн бүрүде амыдыралга херек өске-даа чүүлдер бар 20 тонна гуманитарлыг дузаны Курск обласка чедирген. Сентябрь айның төнчүзүнде Курск областче чорудар ээлчеглиг гуманитарлыг дузаны бо хүннерде республиканың чурттакчылары чыып турар.
Россия биле Украинаның аразында дайынчы хөделиишкиннер чоруп турар девискээрлерниң чурттакчыларынга Тыва Республиканың дузаламчызы улам калбарып турар. Белгород, Брянск болгаш Курск областардан чоруп, Тывада чедип келген российжи хамаатыларны ээлчег чок хүлээп алырын организастаанын Тыва Республика талазы-биле Иштики херектер яамызының миграция айтырыгларының талазы-биле эргелели ИХЯ-ның «ВКонтакте» четкиде паблигинге чарлаан. Үстүнде айыткан областарда чурттап турган черин каггаш, Тывада чедип келген хамааты ону көжер ужурга хамааржыр хамааты эрге-байдалдыг кылдыр хүлээп көөр дугайында билдириишкинни РФ-тиң хамаатызы дугайында документилери-биле кады Тыва Республика талазы-биле Иштики херектер яамызының миграция айтырыгларының талазы-биле органнарынга боду хууда азы Күрүне ачы-дузазының чаңгыс аай порталы дамчыштыр киирер ужурлуг. Миграция органнары ол хамаатыны көжер ужурга хамаарышкан эрге-байдалдыг кылдыр хүлээп көөр болза, ону чуртталга бажың-балгады-биле хандырары дээш ажылдаар болгаш чурттаарынга бүгү дузаламчыны күрүне көргүзер ужурлуг.
Ш. МОҢГУШ белеткээн.
«Шын» №66 2024 чылдың август 31