Украинада болуп турар тускай шериг операциязынче гуманитарлыг дуза чорудар хемчег үзүк-соксаал чокка уламчылап турар. Бо удаада 13 аңгы-аңгы маркалыг автомобильдерни чоруткан.
Саида Моңгуш, Республиканың медицина колледжизиниң директору:
– Бо хүннерде дайынчы хөделиишкиннер девискээринде балыгланган дайынчыларга дуза кадып, эмчиниң хүлээлгезин күүседип турар доозукчуларывыс хөй. Олар аңгы-аңгы чылдарның доозукчулары-дыр. Чорудуп турар автомашинавыс балыгланган солдаттарның амы-тынын камгалаарынга дуза болурун күзеп тур бис.
Бо «УАЗ» маркалыг автомашина эмчи колледжизиниң чычааны-дыр. Документилерин четчелээш, чедер-четпестерин кылып, артык кезектер садар акшаны башкылар болгаш сургуулдар чыыпкаш, кандыг-даа орукка тура дүпшпес кылдыр септээн. Эрги чылдың-даа болза, иштин артык кезектер-биле солуп, чаарткан бис.
Эмчи колледжизиниң коллективинге, гуманитарлыг дуза чыыр ажылды организастап, «Автопоезд» акциязын Тывада организастап турары дээш Улусчу фронтунуң Тыва Республикада салбырынга четтирдивис.
Келир 2025 чылда Республиканың эмчи колледжизи тургустунгандан бээр 80 чыл оюн демдеглээр. Ынча чылдар дургузунда колледж 10 ажыг муң сургуулдарны доостурган.
Тускай шериг операциязында 55-ки гвардейжи мото-адыгжы бригаданың эмчи кезээнде Орлан Ховалыг, Амыр-Санаа дээш элээн каш доозукчуларывыс ажылдап турар. Бо автомашинаны ол эмчилерге адрестээш чорудуп турарывыс бо. Башкыларындан өөреникчилеринге белек-тир ийин.
Эрес Хуурак, ТР-ниң Дээди Хуралының депутады:
– ТР-ниң Чазааның тургусканы чаңгыс аай штабтың болгаш Дээди Хуралдың Даргазы Каң-оол Тимурович Давааның даалгазы-биле 11 автомашинаны Абакан хоорайже чедиргеш, демир-орук поездизинге чүдүргеш, Донда Ростов хоорайга баарывыска, дайынчылар уткуп алыр. Чаа дугуйларны садып салгаш, кывар-чаарны чаартып, кудуп, чычааннарны ажыглаарынга белеткедивис.
Бир машинаны ТР-ниң профэвилелдер даргазы Галина Сюрюн ТШО-да хлеб быжырып турар оолдарга саткан. А өскезин 169 дугаар бригадада Артыш Ондар дээр офицерге, 80 дугаар полкта Наадым дайынчывыска дээш адрестээн автомашиналар-дыр. Ийи чычаанны чоокта чаа социал четкилерге тарап турган видеода автомашиназы чазылган артиллерийжи оолдарга белеткээн. Олар 55-ки гвардейжи мото-адыгжы бригаданың 1 биле 2 дугаар дивизионунуң дайынчылары-дыр.
Саима Далчин, Улусчу фронтунуң Тыва Республикада салбырының даргазы:
– «Автопоезд» Россия чергелиг акцияның деткимчези-биле ээлчеглиг дузаны чорудуп турарывыс бо. Бо чорудуп турар гуманитарлыг дузага аңгы-аңгы организациялар, хавырткан чычааннар, хууда кижилер, «СТО»-лар, мастерлер, артык кезектер садышкан сайгарлыкчылар, хөй-ниити организациялары дээш чоннуң киржилгези кончуг улуг болган. Демир-орукка чедир чычааннарны башкарып чедирер волонтер чолаачылар, кывар-чаар чүүл кудуп берген «Белдир» болгаш «Опти» АЗС-тери дээш, коллективтии-биле кончуг демниг ажылдаан. Коллективтиг ажыл-чорудулга чаңгыс аай штабтың ачызында боттанган деп санаар мен.
«Улусчу фронт-биле черле сырый харылзаалыг ажылдап турар бис. Аъш-чем аймаа-биле ажылдап турар болгаш, дуза кадар ажылдарны кылып чорудуп турар бис. Украинада дуңмаларым, эштерим дайылдажып турар. Ынчангаш бодумнуң күзелим-биле бир чычаанны башкарып чедирер деп шиитпирледим. 18 харлыымдан тура чолаачылаан болгаш, дуржулгам улуг» – деп, «Океан» КХН-ниң чиңгине директору Аян Хертек чугаалады.
Тускай шериг операциязында киржип турар дайынчыларга ачы-дуза чыыр пунктулар дараазында адрестерде ажылдап турар: Кызыл хоорай, Тыва эки турачылар кудумчузу, бажың 3, каб. 3, харылзажыр телефон: 8 (39422) 2-10-50; Кызыл партизаннар кудумчузу, бажың 30, каб. 106.
Айдың ОНДАР.
Буян ООРЖАКТЫҢ тырттырган чуруу.
“Шын” №48 2024 чылдың июнь 29
