Хакас болгаш Тыва республикалар талазы-биле “Россельхознадзор” албанының ажылдакчылары бо чылдың апрель айда ээлчеглиг хыналдалар үезинде, Кызыл кожуунда Ээрбек суурнуң чоогунда көдээ ажыл-агый чергелиг черде, овааландыр төп каан боктар барын илередип тыпканнар. Бокту төккен черниң ниити девискээри 930 дөрбелчин метр деп тодараткан. Ону тудуг материалдарының артынчызы, эргилээн эт-сеп, мал-маган сеги дээш өске-даа бок хөме алган болган.
РФ-тиң Чер дугайында хоойлужудулгазын шыңгыы сагыырын, черни бокталдырып болбазын “Россельхознадзор” албан чериниң ажылдакчылары Ээрбек сумунуң чагыргазынга сагындырып, суур чоогунда тарылга шөлүнде бокту аштаар талазы-биле хемчеглерни дарый алырын негээн.
Ол негелдени Ээрбек сумунуң чагыргазы күүсеткенин хынаар сорулга-биле, бок илереттинген девискээрге 2024 чылдың май айда Хакас болгаш Тыва республикалар талазы-биле “Россельхознадзор” эргелелиниң ажылдакчылары база катап барып чораан. Ол черниң ээзи ооң эрге-байдалынга хамааржыр девискээрни боктан аштап- арыглаан болган.
Черни бок-биле чүдедип турары республикада чидиг айтырыгларның бирээзи. Ынчангаш бойдус камгалалының болгаш “Россельхознадзор” албан чериниң ажылдакчылары бокту кайы хамаанчок төгер чорук-биле демиселди доктаамал чорудуп, аңаа тус чер эрге-чагырга органнарын хаара тудуп келген. “Россельхознадзор” эргелелиниң ажылдакчылары 2024 чылдың эрткен айларында көдээ ажыл-агый чергелиг черлерден азы тарылга шөлдеринден 9 бок оваазын илередип тыпкан, оларны аштаар талазы-биле хемчеглерни ап чоруткан. Ооң түңнелинде 4 бок оваазын бок чыыр болгаш болбаазырадыр пунктуларже үндүр сөөртүп, 10,1714 га шөлдү көдээ ажыл-агыйга катап ажыглалче киирген. Арткан бокту аштаар талазы-биле хемчеглерни “Россельхознадзорнуң” ажылдакчылары чорудуп турар.
Черниң ээлери хамаатылар, чер участоктарын арендага алган кижилер боттарының эргезинде черлерни камгалап карактап, чурттакчы чон ол черлерже бокту аппарып төгерин болдурбазын доктаамал сагындырып келген.
Юрий ОНДАР.
Чурукту интернеттен алган.
«Шын» №40 2024 чылдың июнь 1
