Тывада муӊ-муӊ өөреникчилерни эртем-билигге, амыдыралчы билиглерге өөредип кижизидип, республикага төлептиг кадрларны белеткээн шылгараӊгай башкыларныӊ бирээзи – Борбак-оол Иргитович Араптан.
Ол Тыва Арат Республиканыӊ Бай-Тайга кожууннуӊ Көп-Сөөк деп черге 1938 чылдыӊ март 1-де төрүттүнген.
Борбак-оол Иргитович школаны дооскан соонда, 19 харлыг аныяк оол тургаш, Бай-Тал школазынга орус, тыва дылдар болгаш литература башкызы кылдыр ажылдап эгелээн. Ооӊ соонда Ээрбек суурнуӊ, Туран хоорайныӊ школаларынга завуч, директор, Тес-Хем кожууннуӊ өөредилге килдизиниӊ эргелекчизи болуп ажылдаан.
1978 чылда Сукпак ортумак школазының директорунга томуйлаткан. Аңаа барык 30 чыл директорлаан. Борбак-оол Иргитовичиниӊ удуртулгазы-биле Сукпак ортумак школазы1997-2000 чылдарда Россияның өөредилге яамызының эрттирип турары «Чылдың школазы» деп мөөрейлерге дөрт катап тиилээш, «Чылдыӊ школазы» деп бедик атты чаалап алган.
Борбак-оол Иргитович Аратпан – РФ-тиӊ алдарлыг башкызы, Тыва Республиканыӊ улустуӊ башкызы, РСФСР-ниӊ улус өоредилгезиниӊ тергиини, «XX чүс чылдың директору» деп күрүне шаӊналдарыныӊ эдилекчизи.
Чонга улуг хүндүткелдиг башкыныӊ төрүттүнген хүнүн таварыштыр Тываныӊ Баштыӊы Владислав Ховалыг байын чедирген.
«Россия Федерациязыныӊ алдарлыг башкызы, Тыва Республиканыӊ улустуӊ башкызы Борбак-оол Иргитович Араптан бөгүн 85 харын демдеглеп турар!
Россияда башкылар болгаш дагдыныкчылар чылында хөйге билдингир ук-салгалдыг башкылар династиязыныӊ төлээзинге байыр чедирери ийи дапкыр харыысалга-дыр.
Борбак-оол Иргитович башкы мергежилди шилип алгаш, бүгү назынын ажылынга тураскаадып, ниитилелге бараан болуп, улуг буянныг ажылды кылып, республиканыӊ хөгжүлдезинге аар деӊзилиг үлүг-хуузун киирген. Ат-алдарлыг юбилярныӊ адын Сукпактыӊ ортумак школазы төлептии-биле эдилеп чоруур.
Хүндүлүг Борбак-оол Иргитович! Силерниӊ белен эвес болгаш ачы-буянныг ажыл-ижиӊерге сеткилимден өөрүп, магадап чоруурумну илередирин чөпшээреп көрүӊер! Ам-даа узун назын назылаарыӊарны, эгээртинмес күш-шыдалдыг болуруӊарны, Силерниӊ өг-бүлеӊерге болгаш чоок кижилериӊерге быжыг кадыкшылды, амыр-тайбыӊны болгаш чаагай чолду йөрээп күзедим» – деп, республиканыӊ Баштыӊы социал четкиде блогунга бижээн.
Р. Демчик белеткээн.
