Бөгүн Кадык камгалалының сайыдының оралакчызы Нелля Ховалыг кел чыдар Педиатрлар болгаш чаш уруглар хүнүн уткуштур Тываның педиатр эмчилеринге байырын чедирген. Байырлыг хемчегге республиканың педиатрия адырының хоочуннары болгаш аныяк специалистер киришкен.
«Педиатр эмчиниң болгаш чаш уругнуң хүнүн чаңгыс хүнде демдеглеп турары анаа эвес. Бичии кижиниң кадык өзүлдези болгаш сайзыралы педиатр эмчиниң хайгааралы чокка болдунмас. Педиатрлар дээрге чаштарның кадыкшылын болгаш чуртталгазын камгалаар ажылга боттарын бердинипкен кижилер-дир» - деп, Нелля Ховалыг демдеглээн.
«Кадык камгалал яамызының мурнундан силерниң карак кызыл ажылыңар дээш өөрүп четтирип тур бис. Чаштарны камгалап, оларга сеткилиңер чылыын берип чоруур эки кылган ажылыңар дээш, силерниң чүректериңерни өөрүшкү долуп чорзун!» - деп, сайыттың оралакчызы чугаалаан.
Ооң соонда педиатрия адырының хоочуннарын шаңнап-мактап, тураскаал белектерни берген. Онза кичээнгейни аныяк специалистерже угландырган. Педиатрия адырының тергиин специалистеринге албан черлериниң болгаш күрүне шаңналдарын тывыскан.
Кадык камгалал яамызының медээлеринден
