“Шынның” редакциязынга онзагай аалчы келген. Дерзиг-Аксы суурнуң чурттакчызы, ИХЯ-ның пенсионери Радион Чүлдүм. Чоокта чаа Украинага тускай шериг операциязынга Тывадан эки тура-биле киржип чорааннарның бирээзи. Алыс мергежили – эмчи. Юрист эртемни база чедип алган. Шагаан-Арыгга дүрген дуза албанынга ажылдап чораан. Спортка онза хандыкшылдыг, лыжага ССРЭ-ниң спорт мастеринге кандидат.
Тускай операцияга шериг албан-хүлээлгеге арга-дуржулгалыг өске эштери-биле кады эки тура-биле 2 ай ишти киришкеш, шупту онча-менди ээп келген. Чүгле командири албан-хүлээлгезин улаштырары-биле артып калган.
Шүлүк бижииринге онза сундулуг болганының бир чылдагааны – өгбелеринден дамчып келген салым-чаяаны деп санап чоруур. Кызыл-Эник Кудажы – ооң ачазы-биле алышкылар. Ынчангаш дайынчы байдалга сагыш-сеткилин илередип чораан шүлүктери-биле автор “Шынның” номчукчулары-биле үлешти.
ИНЧЕЕГИМ
Эмнер дыгаан инчеегим,
Ады безин КМУ-86,
Шериг оолдар кадыы дээштиң
Амыр-дыш-даа көрбестедиң.
Сен чок болза, чеже солдат
“Чүък – 200” деп аттыг “чанар”.
Гиппократка даңгыраам бо –
Амы-тынны камгалаары.
Балыглаткан солдаттарга дуза кадып,
Балыын шарып, аккан ханын доктааткаштың,
Төрээн чонум ачы-буянныг инчеегин
Хөрээмге кончуг камныг чыпшыр туттум!
Быжыглааны шын!
Орус, тыва, калмык, дагестан, немец, гагауз оглу,
Чогум черле он сес санныг кымнарыл ол?
Чаңгыс черге мөөңнеттинген – интернационалчы,
Часпас аткаш, шилиттинген эзирлер-дир!
Октуг-боолуг хостакчылар командири
Ондар уктуг эрес-дидим прапорщик,
Хайгыылчылап, кызыгаарны камгалашкан,
Хиним тудуш Тывам төлү Орлан ол-дур!
Эргеледип өстүрүп каан хөөкүй иең,
Кавайың боор төрээн чериң Баян-Талаң
Хары черге кээриңни сүзүктээштиң,
Эки турачы дидимиңни быжыглаан-дыр!
Аажы-чаңың бодамчалыг, топтуг-дур сен,
Алдар-атты, орден-медаль сүрбезиңни
Аткаар баспас дидимиң-биле бадыткадың,
Ам-даа болза, тура-сорууң күштүг-дүр ийин.
БИЛБЕЙН ТУР БИС
Частыышкынның бузундузу чеже удаа
Чанывыстан сыыңайнып эртпеди дээр.
Чаңгыс катап ава шаңнаан чуртталганы
Чакпыыл оъкка алзыптары хомуданчыг.
Бисти манаан чонувусче, төрээн чуртче
Дириг чанып, кемдээшкин чок аъттаныпса.
Чогум черле белек кылдыр Тывавыска
Чүнү хойлап чедирерин билбейн тур бис.
АВТОМАДЫМ “РИМКА”
Он сес санныг эки турачы эзирлерни
Офицерлер дужаал-биле чыскаалдырып,
Чепсек-боону, алыс бодун хынай бээрге,
Шилиттинген дайынчылар белен болду.
Командирим Ондар уктуг Орлан дуңмай
“Каъдыкты кээп амзап көр” – деп кыйгырарга,
Эскен шайның үстүн чажып чалбаргаштың,
“Эвээшти, хөй эвести” дээш, таваам сундум.
Эктим “каастаан чоок эжим” автомадым
Эптиг тудуп, кылаң кылдыр аштавышаан,
Таринамны химиренип номчуп ора,
Таваар, оожум чаагым дегзип, эргелеттим.
“Фамилиязы” АКМ болган өңнүүм сеңээ
Фронтучу бүзүрелдиг атты тыпсып,
Мени манаан чассыгбайым сагынмышаан,
“Римкамны” куспактааштың, суйбап ор мен.