Август 8-те Улусчу чогаадылга бажыңынга Россия Банкызының 165 чыл, Таңды-Тывазының садыг-үлетпүр банкызының 100 чылы болгаш ССРЭ-ниң Күрүне банкызының тыва область конторазының тургустунганындан бээр 80 чыл оюн демдеглээн байырлыг хурал болуп эрткен.
Фойени долдур чурттуң банк системазының төөгүзүнге тураскааткан делгелгени кылган. Артистер хөгжүм-биле аалчыларын фойеден-не уткуп ойнаан, янзы-бүрү сорттуң кофезиниң чаагай чыды байырланчыг болгаш ажыл-херекчи байдалды тургузуп турган.
Байырлыг хуралга ТР-ниң Чазааның Даргазы Владислав Ховалыг, Дээди Хуралдың (Парламентиниң) Даргазы Каң-оол Даваа, ТР-ниң экономика сайыдының оралакчызы Аржаана Донгак, Россияның Төп банкызының Сибирьде кол эргелелиниң начальнигиниң оралакчызы Артур Музяев болгаш өске-даа ажыл-агыйы акша-хөреңги-биле холбаалыг хүндүлүг аалчылар киришкен. РФ-тиң Төп банкызының Сибирьде кол эргелелиниң Тыва Республикада Национал банкызы – салбырының башкарыкчызы Олег Удумбара чалап алганы аалчыларынга, банк системазының хоочуннарынга болгаш байырлалдың киржикчилеринге байырын чедирип, өөрүп четтиргенин илереткен.
ТР-ниң Баштыңы Владислав Ховалыг банк системазының хоочуннарынга байырын чедирип тура, 100 чыл бурунгаар тургустунган Тыва Банк республиканың саң-хөөзүнүң үндезини болбушаан, экономиктиг сайзыралдың кол шимчедикчи күжү болуп турар дээрзин айыткан. «Чоннуң саң-хөөге хамаарышкан билиглерин сайзырадып, школачылар болгаш студентилер-биле ажылдап, солун хемчеглерни организастап турары дээш Национал банкының Тывада салбырының ажыл-чорудулгазын онзагайлап демдеглекседим. Парлап үндүрген «Саң-хөө-экономиктиг терминнерниң орус-тыва тайылбыр словары» республиканың чаа салгалын чырыдып, билиглер-биле чепсеглээр улуг ужур-уткалыг» – деп, ол үнелээн.
Хөй чылдар дургузунда ак сеткилдиг ажылы болгаш банк системазынга мергежээни дээш Тыва Республиканың Баштыңының Өөрүп четтиришкинин ТР-де Национал банкының салбырының айыыл чок чорук килдизиниң бирги категорияның эксперди Чейнеш Доржукайга, шимчевес өнчү-хөреңгини башкарар килдистиң кол инженери Андрей Кузминге, информатизация килдизиниң сектор эргелекчизи Алексей Ондарга, күрүне чажыдын харыылаар секторнуң эргелекчизи Ольга Канданга, информатизация килдизиниң кол инженери Виктор Плетневка, персонал-биле ажылдаар секторнуң эргелекчизи Агата Ондарга, клиентилер-биле ажылдаар килдистиң кол специализи Ирина Салчакка илереткен. Тываның Баштыңының Чарлыы-биле банк системазының сайзыралынга киирген улуг үлүг-хуузу болгаш бедик мергежилдии, хөй чылдарда ак сеткилдиг ажылы дээш «Тыва Республиканың алдарлыг ажылдакчызы» деп хүндүлүг атты информатизация килдизиниң кол инженери Владимир Тарасенкога тывыскан.
Дээди Хуралдың Хүндүлел бижии-биле административтиг килдистиң башкарыкчы эксперди Урана Сарыглар шаңнаткан. Национал банкының башкарыкчызының дузалакчызы Аяна Кара-оолга Дээди Хуралдың даргазының өөрүп четтиргенин илереткен бижиин тывыскан.
Банк ажылдакчыларының байырлалын Тываның ат-алдарлыг артистери каастажып берип, улам аян-шинчи киирген.
Надежда КУУЛАР.
Буян ООРЖАКТЫҢ тырттырган чуруктары
“Шын” №31 2025 чылдың август 14
