Чамдык хамаатылар экстремист кижи кымыл деп билбес болганындан херекке онаажы берип болурунуң айыылы бар. Ынчангаш экстремист кижи кымыл деп чүүлдү билири чугула.
Олар чурттуң ниити дүрүмнерин хажыдар чорукче чонну кыйгырар. Боду бодун удуртукчу кылдыр санаар. Хоойлу-дүрүмге дүүшпес медээлерни тарадыр. Террорисчи чоруктар дугайында меге медээлерни удаа-дараа албан-биле чогааткаш, интернет четкизинче үндүрер. Террорисчи үүлгедиглерни белеткеп турарының болгаш оларның организакчыларының дугайында чогуур органнарга дыңнатпас. Омак-сөөк аңгылаар, бодундан өске улустуң азы чоннарның чүдүлгезин, дылын шүгүмчүлээр, террорисчи чорук кылган хамаатыларга болчур, үндезин чок черге удуртукчулар нүгүлдээр дээш оон-даа өске хоойлуга дүүшпес чүүлдер кылыр хамаатыларны экстремист дээр.
Экстремисчи чорук дээш Россия Федерациязының Кеземче кодекизи ёзугаар кем-херекке онаажып болурун Россияның Айыыл чок чоруунуң федералдыг албанының Тыва Республика талазы-биле эргелели ол талазы-биле чурумну тудуп турар дээрзи билдингир.
2015 чылдың ноябрь айда эдилгелерге үндезилээш, Библия, Коран, Танах болгаш Ганджур шажынчы номналдарның иштинде бижээн цитаталар болгаш номнар боттары экстремисчи материалдарга хамаарышпас дээрзин сагындыраал.
Айдың ОНДАР.