Кандыг-даа элээди уруг кымга-даа хамаарышпас, хостуг болуксаар. Ылаңгыя боду акшаны тудуп, чарып азы чыып алыксаар. Ындыг уругларга ажыл дыка дузалаар. А ада-иезинге төлү бир-ле ажылды кылып, келир үеде амыдыралынга херек апаар ажыктыг мергежилге өөренип ап, күш-ажылдың үнезин билип эгелээрге, өөрүнчүг болбайн канчаар.
Ынчангаш ажылдаксап турар элээдилер болгаш ада-иелерни сонуургадып турар айтырыгларны сайгарып көрээлиңер.
Күш-ажыл керээзин чүгле 16 хардан өрү назылыг кижи чарар дээри шын бе?
Керээ езугаар бир эвес ажыл чиик болгаш кадыкка хора чедирбес болза, 14 хардан тура ажылдап болур. Аңаа ада-иениң болгаш хоойлу езугаар харыылап турар кижиниң чөпшээрели херек, а бир эвес элээди уруг өскүс болза, харагалзал черинден алыр. Ол ышкаш кайы-бир негелдени күүседир ужурлуг: - элээди уругнуң ниити билии бар; ол өөренип турза-даа, ажыл аңаа шаптык болбас.
14 харга чедир уруг чогаадыкчы адырга — кино, театр азы циркке, ол ышкаш спорт адырынга ажылдааш — маргылдааларга киришкеш база аңаа белеткенгеш акша ажылдап ап болур.
Бо таварылгада керээге ада-иези, азырап турар кижи азы харагалзал чери ат салыр. Ооң кадында уругнуң кадыынга болгаш мөзү-шынарынга хора чедирерин болдурбас.
18 хар чедир назылыг уруг кандыг ажылдарга ажылдап болбазыл?
- вахталаар ажылга;
- хоралыг болгаш айыылдыг, ол ышкаш казино азы кежээки клубтарга;
- дакпырлап;
- транспорт башкарар болгаш транспорт шимчээшкининге хамаарылгалыг.
Назы четпээн ажылдакчыга шөлээ бээр бе?
Ийе, элээди уругга чыл санының шөлээзин — 31 календарь хүннери-биле бодунга эптиг үеде ап болур. Шөлээ мурнунда 6 ай ажылдаары албан эвес.
«РОСТРУД» күш-ажыл талазы-биле федералдыг албанның сайтызындан белеткээн.
Чуруктарны интернеттен алган.
«Шын» №40 2024 чылдың июнь 1
