Калмыкияның төвү Элиста хоорайга Буддизмниң чоннар аразының үшкү шуулганы сентябрь 25 – 28 хүннерде болуп эртер. Аңаа 35 чурттардан делегациялар келир. Оларның аразында Кыдаттың, Индияның Непалдың, Моолдуң, Казахстанның, Германияның дээш өске-даа чурттарның буддистериниң төлээлери бар. Россиядан Тыва биле Бурятияның буддистери ол улуг шуулганга киржир.
Шуулганның хүндүлүг аалчыларының аразында Кыдатта Шаолин хүрээзиниң дайынчы мергежилдер школазының директору дээрги Чэнь Цзюнькай, Индияда Палден Таши Дрепунг Гоманг Монастыр университеттиң улуг башкызы дээрги Джигме Гьяцо, Азияның тайбың дээш буддийжи конференциязының чиңгине секретары Да Лама Бямбаджав Хунхур (Моол) дээш өскелер-даа бар.
“Россия хөй национал чоннарлыг күрүне, бис аңаа чоргаарланыр бис. Делегей чергелиг шуулган Калмыкияга улуг ужур-дузалыг, күрүнелер аразынга чурттуң ат-алдарын көдүреринге бистиң республикага эртер буддийжи шуулган дыка салдарлыг боор” – деп, Калмык Республиканың Баштыңы Бату Хасиков демдеглээн.
Буддизмниң чоннар аразының үшкү шуулганынынң ажылы ийи аңгы угланыышкынныг – ажыл-херекчи кезии болгаш культура программазы. Культура программазы Россияның буддийжи чүдүлгелиг улустарының төөгүзүн болгаш ёзу-чаңчылдарын шуулганның киржикчилеринге таныштырар.
Шуулганның организакчылары 50 ажыг хемчеглерни эрттирер. Сентябрь 25-те Индияның Национал музейиниң буддийжи ыдык чүүлдериниң делгелгези ажыттынар. Бо делгелгеже “Санкт-Петербург хоорайның музейлеринде калмык буддизмниң ыдыктыг үнелиг чүүлдери” көргүзүгнү база киирген.
Буддизмниң чоннар аразының үшкү шуулганы сентябрь 28-те дайынчы мергежилдерниң “Күштүң болгаш сүзүгнүң гармониязы” деп делегей чергелиг фестиваль болгаш “Джангариада” деп калмык культура-спорт байырлалы-биле доостур.
Чуруктарны Калмык республиканың парлалга албанындан алган
12+
