Июнь 15 – Медицина ажылдакчызының хүнү
Республиканың эмчилериниң буянныг ажыл-үүлезин бүгү Россия деңнелинге чөптүү-биле үнелеп турары Тываның чурттакчыларынга өөрүнчүг.
2024 чылда “Чылдың эң эки эмчизи” Бүгү-российжи мөөрейниң “Эң эки хирург эмчи” номинациязының ийиги чергезинге республиканың 1 дугаар эмнелгезиниң рентгенэндоваскулярлыг диагностика болгаш эмнелге эмчизи Росси Күжүгет төлептиг болган. Ол 1999 чылда Бай-Тайга кожууннуң Кызыл-Даг ниити билиг школазын мөңгүн медаль-биле дооскан. Иркутскунуң күрүнениң эмчи институдун 2005 чылда дооскан. 2005 – 2007 чылдарда ол-ла институттуң клиниктиг ординатуразынга “хирургия” эртеминге өөренип турган. Эмнелге ажыл-чорудулгазын Таңды кожууннуң төп эмнелгезинге хирург эмчилеп эгелээн. 2009 – 2011 чылдарда академик Е.Н. Мешалкин аттыг медицина шинчилелиниң национал төвүнүң клиниктиг ординатуразынга “чүрек-дамыр хирургиязы” мергежилге өөредилгени эрткен. 2011 чылда Тайваньга стажировка эрткен. Е.Н. Мешалкин аттыг медицина шинчилелиниң национал төвүнүң кардиохирургия салбырынга хирург эмчилеп ажылдаан. Республиканың эмнелгелеринге хирург эмчи болуп, кадык камгалалынга улуг үлүүн киирген.
2024 чылдың “Чылдың эң эки эмчизи” Бүгү-российжи мөөрейниң “Медицинаның дүрген дузазының эң эки эмчизи” номинацияның ийиги чергезинге медицинаның дүрген дузазының республика төвүнүң эмчизи Людмила Рудько төлептиг болган. Ол Кызылдың 4 дугаар школазын тергиин эки өөредилге-биле дооскан. 1979 чылда Красноярскының күрүнениң эмчи институдунче өөренип кирген. 1985 чылда институтту дооскаш, Кызыл хоорайның медицинаның дүрген дуза станциязынга эмчилеп ажылдап эгелээн. Людмила Евгеньевна 40 ажыг чылдар дургузунда кижилерге дүрген эмчи дузазын чедирип ажылдап келген. Кижи кандыг аарыгдан аараанын дүрген тодарадыптар, эмчи дузазын дораан-на чедириптер арга-дуржулгалыг эмчи.
Людмила Евгеньевна – “Дүрген дуза медициназының” дээди категориязының эмчизи. Тываның кадык камгалалынга хөй чылдар дургузунда үре-түңнелдиг ажылы, ооң сайзыралынга киирген улуг үлүг-хуузу дээш Россияның Кадык камгалал яамызының Хүндүлел бижии, “Кадык камгалалының тергиини” хөрек демдээ-биле шаңнаткан.
Бистиң корр.
«Шын» №22 2025 чылдың июнь 12