Республиканың 2 дугаар эмнелгезинге чыда эмнедир аас-кежиктиг болдум.
Эргелекчизи Анджела Канчыыр-оол коллективти кончуг билдилиг удуртуп турар болду. Эмчиниң бодунуң хүлүмзүрээн шырай-арны, эвилең-ээлдек бүдүжү, кижизии өскелерге үлегер-чижек. Найыралдыг улуг коллективте өске улуг эмчилер база чон дээш сагыш аарып, аарыг кижилерге хамаарылгазы, кичээнгейи эки-дир.
Улуг эмчиниң оралакчызы невролог эмчи Маргарита Балчир мени хүлээп алгаш, тайылбырлааш, компьютерге каш шаккылаткан соонда, мээң эртер ужурлуг эмчилеримге шынзылганы үндүрүп берди. Кончуг-даа шалыпкын ажылдаар, негелделиг эмчи болду. Чаңы база чаптанчыг.
Чүрек болгаш ниити аарыглар эмчизи Аржаана Эникпен аарыг кижилерге кичээнгейлиг, топтуг-томаанныг, бүдүштүг эмчи болду. Кижиге тайылбырының чедимчелиин. Кончуг-даа шыырак билдилиг эмчи чорду. Анай-Хаак Санчат – ниити аарыглар эмчизи. Кижилерге кичээнгейлиг, сагыш човаачал. Хан-дамырже эм салыр, сыкыртыр эмчилерниң холунуң чымчаа, мергежилинге бердингени аажок, дамырлар үревес, шыырак, эки-дир. Оларга Алимаа Каммаан-оол, Чимис Саая, Лина Оюн болгаш өскелер-даа хамааржыр.
Амгы үениң агымы-биле деңге сайзыраан болгаш эмнелгеде аарыг кижиниң мага-бодун өттүр көөр, шинчилээр, тырттырар аппараттар, УЗИ, рентген, компьютерлиг томография-биле четчелеттинген. Кандыг-даа аарыгны дүргени-биле тодарадыпкаш, чедимчелиг эмнээшкинни дораан эгелей бээри чогумчалыг.
Эргелекчи боду диетолог болгаш ындыг бе, аъш-чемниң шынары эки, чаагай. Палаталарны санитаркалар удаа-дараа чуур. Ийиги каътта чыдар салбырда улуг зал телевизор болгаш диваннар-биле дериттинген. Улуг балконда эртенги, кежээки үеде сула шимчээшкиннер кылыр кылдыр чадыгны дыка эптиг кылдыр чаткан.
Эмнелгени долгандыр тарыттынган чойган, шиви, хадыларның чыды онза чаагай. Аарыг кижилерниң кадыы экижииринге дыка таарымчалыг. Даштын селгүүстээр, дыштанып олурар узун-узун сандайларын долгандыр чүзүн-баазын чечектер бүргээн.
Бо чылын Россияда Өг-бүле, Тывада Кадыкшыл чылын чарлаан болгай. Чонунга кадык амыдыралды суртаалдап, эмнеп чоруур эмчилеривиске, оларның коллективинге четтиргенимни илередип, мөгейдим. Буянныг эмчилеривиске кадыкшылды, амы-хууда чуртталгаңарга аас-кежикти, узун назынны күзедим!
Аккыр халат сынын каастаан,
Аажок чараш эмчилерни.
Арат-чон дээш сагыш човаан,
Ачылыг-ла эмчилерни.
Хүрең-хүрең шырайында
Хүлүмзүрүг чайнап ойнаан.
Ажылдаары шалып, дүрген
Аарыгларның когун үзер.
Ал-боттары каң дег кадык,
Ажыл-үүлези бүдүп чорзун!
Амыдырал-чуртталгаңарга
Аас-кежик чайнап чорзун!
Светлана Хомушку, РФ-тиң өөредилгезиниң тергиини.
“Шын” №73 2024 чылдың сентябрь 25