Тускай шериг операциязының эгелээнинден бээр республиканың чурттакчы чону нацизм-биле демисежип турар чаңгыс чер чурттугларывыска гуманитарлыг дузаны чыггаш, чоргузуп келген. Идик-хеп, аъш-чем болгаш чугула херек чүүлдерни волонтерлар, хууда сайгарлыкчылар болгаш ажылчын коллективтер чыып турар. Республиканың халдавырлыг аарыглар эмнелгезиниң коллективи база 55-ки мотоадыгжы (даг) бригадазынга чылыг хептерни болгаш дериг-херекселдерни дамчыдып берген.
“Бистиң адаларывыс, акы-дуңмаларывыс, оолдарывыс бисти болгаш чуртувусту камгалаары-биле долу эвес мобилизацияже чоруп турарлар. Бистиң деткимчевис болгаш сагыш салыышкынывыс оларга аажок хереглеттинип турар. Коллектививисте 300 кижи шупту бирден бирээ чокка чаңгыс чер чурттугларывыска дузалажыр деп шиитпирлээн улус бис. Акша-хөреңгини чыггаш, шериглеривиске кыш удур хой дүгүнден чылыг уктарны, хөйлеңнерни, кышкы идиктерни, иштинге удуур хаптарны садып бердивис. 15 кижиге комплект кылдыр чыгдывыс” – деп, эмнелгениң улуг эмчизи Анна Сарыглар чугаалаан.
Оон аңгыда, чыгдынган акша-хөреңги-биле 15 рация, дураннар, фонарьлар база саттынган. Ооң мурнунда тускай шериг операциязынга киржип турган шериглерниң сүмези-биле херекселдерни сатканын, улуг эмчиниң ажыл-агый талазы-биле оралакчызы Аяс Докпер-оол чугаалаан:
“Тодаргай бир фирманың рациялары херек турган. Ынчангаш ону сатканывыс ол. Чүктээрге, бичии-даа болза, эптиг болгаш көстүрү тода дураннар база. Берцыларны улдуңунуң кылын-чугазын көрүп тургаш, саттывыс. Шериглерге ажыглаарга эптиг болзун дээш, хавакка кедер фонарьларны шилидивис”.
Чыгдынган комплектилерниң бирээзин халдавырлыг аарыглар эмнелгезиниң чоокта чаа келдириишкин алган бир ажылдакчызынга берген.
Ук эмнелгениң коллективи ооң мурнунда база эм-таң, аъш-чем, чугула херек херекселдер-биле дузалажып турганын айтып калза чогуур.
Юлия Сат.
Буян ООРЖАКТЫҢ тырттырган чуруктары.
