“Россети Сибирь Тываэнерго” компанияның, монополияга удур федералдыг албанның регионда эргелелиниң болгаш республиканың Тарифтер албанының удуртукчулары электри четкилеринге коштунарының нарын айтырыгларын сайгарып чугаалашкан. Бо айтырыг Тыва Республикада чидиг байдалдыг апарган. Ооң тыптып келген чылдагааннарын болгаш канчаар шиитпирлеп болурун “Россети Сибирь Тываэнерго” компанияның директору Антон Лукин, монополияга удур федералдыг албанның регионда эргелелиниң даргазы Феликс Хаджиев болгаш республиканың Тарифтер албанының удуртукчузу Елена Бочарова тыварын оралдашканнар.
Электри четкилеринге технологтуг коштунарының дугуржулгаларын өй-шаанда күүседип шыдавайн баарының кол чылдагааны — акшаландырыышкынның чедишпези болгаш экономиктиг көргүзүглер-биле бадыткаттынган тарифтерниң чогу. Технологтуг коштунуушкуннарга чиигелделиг хамаатыларны херек кырында кожарының чарыгдалдары дугуржулгаларда көрдүнген чарыгдалдардан каш катап хөй болуп турарын “Россети Сибирь Тываэнерго” компанияның директору Антон Лукин чугаалаан. Чижээлээрге, технологтуг коштунуушкуннарга чиигелделиг хамаатыларның төлээн акшазындан, оларны энергетиктерниң электри четкилерге херек кырында кошканының чарыгдалдары 2024 чылда 124 сая рубль хөй болган.
Чиигелделиг хамаатыларны электри четкилеринге кошканының херек кырында чарыгдалдары биле оларның дугуржулга ёзугаар төлээн акшазының аразында артык чарыгдалдарны төледип алыры-биле “Россети Сибирь Тываэнерго” компания документилерни республиканың Тарифтер албанынче чылдың-на киирип, тарифтерни деңзигүүрлүг тургузарының негелделерин чылдың-на көдүрүп келген. Ынчалза-даа тарифтерни долузу-биле Тарифтер албаны доктаатпайн турар. 2024 чылда “Россети Сибирь Тываэнерго” компанияның киирген чагыгларының хемчээлиниң чүгле 30 хуузун бадылаан. 2025 чылда байдал улам баксыраан, чугула херек акша-хөреңгиниң 1 рубли-даа бадыткаттынмаан. Электри-биле хандырылганың үрелиишкин чогун магадылаарынче угландырган техниктиг хемчеглерни чорударынга херек акшаландырыышкын амга чедир көрдүнмээн. 2025 чылда чедир акшаландырбаанының ниити түңү чартык миллиард рубль ажыг деп энергетиктер санап үндүрген.
Тургустунуп келген байдалды Тыва Республиканың Тарифтер албанының удуртукчузу Елена Бочарова деңзигүүрлүг тарифтерни хүлээп алырын хереглел өртектериниң индекстери кызыгаарлап турары-биле тайылбырлаан.
Артык болгаш тарифтер-биле көрдүнмээн чарыгдалдарны чогуур документилер-биле бадыткап, ону суд дамчыштыр төледип алырын энергетиктерге монополияга удур федералдыг албанның регионда эргелелиниң удуртукчузу Феликс Хаджиев саналдаан.
“Россети Сибирь Тываэнерго” компанияның, монополияга удур федералдыг албанның регионда эргелелиниң болгаш республиканың Тарифтер албанының удуртукчуларының ужуражыышкыннары кады ажылдажылганың бир хевири болуп, энергетиктерниң болгаш хереглекчилерниң эрге-ажыын чөптүү-биле камгалаарының аргазы апарган. Энергетика адырын четчири-биле акшаландырарындан энергетиктерниң чедиишкинниг ажылы болгаш энергия күжү-биле хандырылга дыка хамааржыр.
Ш. ЛОПСАН белеткээн.
Чурукту “Россети Сибирь Тываэнерго” парлалга албанындан алган.
“Шын” №6 2025 чылдың февраль 20