Кыш эгезинден бээр Тывада халдавырлыг тыныш аарыындан аараан таварылгалар саны эпидемиологтуг деңнелден ажа бергени бир дугаар демдеглеттинген. Росхереглелхайгааралдың регионалдыг эргелелиниң удуртукчузу Людмила Салчак Чазак хуралында сезоннуг аарыгларның байдалын республика Баштыңынга илеткээн.
Ведомствонуң дыңнатканы-биле алырга, декабрь 7-ниң хүнүнде Тывада ОРВИ-ден аараан ниитизи-биле 2583 таварылга бүрүткеттинген. Аарыгның деңнели 10 муң кижиге онааштыр 73 чеде бергени эпидемиологтуг деңнелден 12,2 хуу бедик. Эрткен неделяга деңнээрге, эмчилерден дуза дилеп барган кижилер саны элээн өскен.
ОРВИ халдавырының эң улуг өзүлдези школа назыны четпээн уруглар болгаш школачылар аразынга болган– бо бөлүктерде эпидемияның деңнели 28,3 болгаш 39,4 хуу ажа берген. Хыналда хайгаарал органнарының болгаш эмчилерниң негелдези ёзугаар, элээн каш уруглар садтарында болгаш школаларда аарыгның тарап нептерээрин болдурбас хемчеглерни киирген.
Туран хоорайда ийи база Кызыл-Мажалык суурда бир – үш школаны ырактан өөредир хевирже шилчиткен. Кызыл хоорайның беш школазында, ол ышкаш Сөөш, Эрзин, Мугур-Аксы суурларда – шупту беш школада кичээлдерни түр када соксаткан. Бии-Хем биле Бай-Тайга кожууннарның дөрт уруглар садтарында карантинни чарлаан.
ОРВИ дээш эмчилерден дуза дилеп келген аарыг кижилерниң биоматериалдарын хынаарга, оларның чартыы грипптиң А вирузу-биле, тодаргайлаарга, H3N2 хевири азы Гонконг гриви-биле аарып турар болган. А чартыындан риновирусту тыпкан.
Ылаңгыя иммунитеди ам-даа сайзыраваан 3 хар четпээн уругларга, 55 хардан өрү назылыг хоочураан аарыгларлыг кижилерге база иштиг херээженнерге гонконг гриви онза айыылдыг деп эмчилер сагындырып турар. Аарывас дизе, хөй кижилер чыылган черлерже баарын кызыгаарлап, масканы кедип, холдарны чуур. Эпидемиологтуг сезон бүдүүзүнде гриппке удур тарыдып алган улус аарыгны чиик эртер.
Республиканың эрге-чагыргалары база муниципалдыг тургузуглар ОРВИ эпидемиязының тарап нептерээрин болдурбазы-биле, элээн каш немелде хемчеглерни алыр ужурлуг деп Людмила Салчак санап турар. Массалыг хемчеглерни кызыгаарлап, маска чурумун киирип, «эртенги хыналдаларны» чорудуп, арыгланыр черлерни аштап-чүлгүп, албан черлериниң иштинге кижилер аразында харылзааны база эмнелгелерде чыдар кижилерже баарын эвээжедир деп специалистер сүмелеп турар.
Бистиң корр.
Чурукту ТР-ниң Чазааның парлалга албанындан алган.
“Шын” №49 2025 чылдың декабрь 18