Кызыл хоорайда автомашиналарның саны чылдан чылче көвүдээш, харын-даа мырыңай сыңышпастаан деп болур. Ооң-биле холбаштыр хоорай иштинге автомобиль шимчээшкини нарыыдаан, эрткен-дүшкен чадаг кижилерге база элээн ондактыг апарган. Хоорайның кудумчуларында оруктарга автомобильдер болгаш чадаг кижилер шимчээшкининге таарымчалыг база айыыл чок байдалды тургузары-биле, оларны сөөлгү ийи-үш чылдарда делгемчиди септеп келген.
Хоорайның төп болгаш хөй автомашиналар чоруп турар Ленин, Кочетов кудумчуларны, Гастелло аттыг дыштанылга парыгы – Интернациональная кудумчузу кварталды, Кочетов биле Комсомольская кудумчуларның белдиринде, чоннуң “Чуртталга бажыңы” (Дом быта) деп адай бергени хөй садыг-наймаалыг алды каът бажың чоок-кавызы дээш өске-даа кудумчуларда оруктарны алгыдып септээни, машиналар тургузар “кармактарны” тутканы автомобиль болгаш чадаг кижилер шимчээшкини айыыл чок болурунга салдарлыг болган.
Кызылдың кыдыкы кудумчулары база хайым автомобиль шимчээшкинниг апарган. Аңаа автомашиналар шимчээшкини эптиг болгаш айыыл чок болзун дээш, ол кудумчуларда септелге ажылдарын чорудуп эгелээн.
“Орук-тудуг-транспорт” кызыгаарлаан харыысалгалыг ниитилелдиң ажылдакчылары РПС, “Обувь” садыг баазаларының чоогунда, хөй автомобиль шимчээшкинниг Каменистая кудумчунуң оруунуң септелгезин апрель 6-ның хүнүнде эгелээн.
“Орук-тудуг-транспорт” КХН-ниң кол инженери Иван Мордвинковтуң дыңнатканы-биле алырга, узун дуртуг 700 метр орукту дооразы 7 метр кылдыр алгыдар, ооң кыдыынга узун дургаар чадаг кижилер кылаштаар тротуарны тудар, оруктуң ийи талазынга электри сайгылгааннарының чагыларын тургузар. Септелге ажылдарын сентябрь айда доозарын планнаан. Келир күзүн бо орук дески, делгем, караңгыда сайгылгааннар-биле чырыдар орук апаар. Бүгү септелге ажылдарынга 23 млн рубль көрдүнген. Ажылды чагыткан организация – Кызылдың мэриязының ажыл-агый департаментизи.
Септелге ажылдарын мастер Сонам Ынаалай удуртуп турар. Амгы үеде Каменистая кудумчуда оруктуң эрги асфальтызын сөп, ону машиналарга чүдүргеш, өскээр сөөртүп, оруктуң сай таваан бедидир чалдаар, ону тырый бастырар ажылдарга белеткелди чорудуп турар.
Кызыл хоорайның база бир хөй автомобиль шимчээшкинниг кудумчузу
– Чоокку Каа-Хем суурже шөйлүп чоруткан Колхозная. Бо кудумчуда орукту аай-дедир дөрт дилиндектерлиг кылдыр алгыдыр септээри – 2023–2024 чылдарда боттандырар ужурлуг улуг төлевилел. Ниити узун дурту дөрт километр оруктуң 2 километрин бо чылын септеп доозар, арткан 2 километрни — 2024 чылда. Колхозная биле Магистральная кудумчуларда оруктарның аразынга доора кудумчуда орукту алгыдыр септээри база төлевилелде көрдүнген. Бо септелге ажылдарынга чарыгдаар акша-төгерик 600 миллион рубль. Орук ажылдарының чагыкчызы Кызыл хоорайның мэриязы.
Оруктуң септелгезин чонга эки билдингир “Восток” КХН чорудуп турар. Бо оруктуң септелгези элээн нарын байдалга болур, чүге дизе ооң адаанда чер иштинде суг, чылыг дээш өске-даа четкилер бар. Орукту калбартыры-биле холбаштыр Кызыл – Чоокку Каа-Хем аразынга автотранспорт шимчээшкининге түр када бергедээшкиннер тыптып кээр. Ону база таарыштыр организастаар апаар.
Кызыл – Чоокку Каа-Хем аразынга делгем болгаш орук шимчээшкинин организастаарының бүгү негелделеринге дүгжүр орукту тудуп турар үеде түр када бергедээшкиннерниң чылдагааннарын медереп билиринче, автомобиль шимчээшкини айыыл чок болурунга деткимчени орукка кичээнгейлиг чоруу-биле деткииринче республиканың орук-транспорт сайыды Шораан Чыргал-оол чолаачыларны кыйгырып турар.
/ Шаңгыр-оол МОҢГУШ.
Буян ООРЖАКТЫҢ тырттырган чуруктары.
"Шын" №26 2023 чылдың апрель 12
#Шынсолун #Тыва #ОрукТудуу #СептелгеАжылдары #Оруктудугтранспорт #КызылХоорай
