Тываның Баштыңы Владислав Ховалыг республикада автооруктарның байдалын бодунуң блогунда бижип турар:
“Тываның автооруктарында байдал шак санында өскерлип турар. Дугуй кырында турар республикага ол дээрге белен эвес байдал. Хууда сайгарлыкчылардан эгелээш, бүгү күштү мөөңнедивис. Хандагайты – Мугур-Аксы оруунда үрелген көвүрүгнүң таварылгазында дег бир кезек черге айтырыгны божуу-далаш шиитпирлээр ужурга-даа таваржып турдувус. Дүүн “Восток” КХН ону катап тургузуп кагды. Суг-Аксыдан Баян-Талаже киир оруктуң кезиндээнде улуг суг машина-балгат эртер черже үнүп келген. Чазак Даргазының оралакчызының хүлээлгезин күүседип турар Алик Монгуштуң баштааны штаб Сүт-Хөлде ажылдаарын уламчылавышаан.
Республиканың барыын талазында база бир оралакчы даргазының хүлээлгезин күүседип турар Виталий Бартына-Сады, орук болгаш транспорт сайыды Шораан Чыргал-оол олар ажылдап турарлар. Абакан
— Ак-Довурак аразының участогунда түр үеде оюп эртер оруунуң чаагайжыдылгазын олар кылып турарлар. Ак хемниң суунуң дажаанының түңнелинде, эрикти быжыглап турар чалдар, көвүрүгнүң баганалары үрелген! Орукту түр када хагган! Ында доскуулду тургускан. Ак-довуракчылар болгаш барыын кожууннарның чону Абаканга чедир Кызыл таварыштыр Р-257 федералдыг орук-биле эртип болурлар. Ук көвүрүгнүң чаартылгазы хөй түңнүг акша-хөреңгини болгаш күштү негээр. Россияның Орук болгаш транспорт яамызынче долгааш, тургустунуп келген байдалды тайылбырлааш, чедиртинген когаралды санап түңнээр, катап тургузуушкуннуң болгаш септелге ажылдарының талазы-биле ажылчын бөлүктү тургузарын диледим.
Бай-Тайгада Тээли – Кызыл-Даг аразының кежии, а ол ышкаш Кара-Хөлче орук түр када хагдынган. Суг чавырлы бээри билек, орук албаннары ажылдап эгелээр. Мээң даалгам езугаар Кара-Хөл биле Кызыл-Даг суурларже чурттакчы чонга дузаның хемчээлин тодарадып, вертолет ужуп чоруур. Орук хагдынчак турда, ындыг дуза чедирери болдунмас-тыр ийин.
Автооруктарда берге байдал тургустунза-даа, келген чаъс-чар өрттер-биле байдалга салдар чедирери чугаажок. Үш хүн улаштыр Тывада арга-арыгларга онза байдал ажылдап турар. Сөөлгү хонуктарның дургузунда 4 өрттү өжүрдүвүс. Ниитизи-биле июнь 13-түң эртенинде 8 өрт бүрүткеттинген.
Дус-Даг сумузунга болган үерниң ужун июнь 6-да Торгалыг хемни кежилдир улусту аргыштырары бергедээн турган. Тываның Орук болгаш транспорт яамызының, “Тываавтоорук” чериниң, Өвүр кожууннуң чагыргаларының ачызында Дус-Даг биле Чаа-Суур сумуларының Торгалыг хемни кежилдир кежиглерин дөрт хонуктуң дургузунда катап тургускан. Чурттакчыларның өөрүп четтириишкининиң сөстерин оларга дамчыттым”.
А.Хертек белеткээн.
"Шын" №43 2023 чылдың июнь 14
