Агаар-бойдус хенертен изип эгелээрге, чурттакчы чонну бир дүвүредир айтырыг – үер айыыл-халавы. Кызыл кожууннуң девискээринде турар “Дар” дачаларынче бөгүн барып, ында байдал-биле таныштывыс. Бистиң барып турар үевисте дачаларның үстүкү кезээнде 10 хире машина-техника Каа-Хем суунуң эриин быжыглаары-биле камгалал чалдарны кылып турар болду. Беш километрде шөйлү берген чаа чал 1,5 муң чурттакчылыг бажыңнарны, школаны, уруглар садын база өске-даа оран-саваны сугга алыспайн, камгалаар ужурлуг. Бо девискээрни чылдың-на үер айыыл-халавы дүвүреди бээр.
Республиканың чуртталга-коммунал ажыл-агый сайыды Мерген Мынын-оолдуң чугаазын кысказы-биле дамчыттывыс: “Суг айыыл-халавын болдурбазы-биле кандыг-даа байдалга белен болур ужурлуг бис. Ынчангаш камгалал чалдарны кылыры-биле «Транспорт сервизи болгаш төлевилел» деп күрүнениң унитарлыг бүдүрүлгезиниң база “Восток” деп КХН-ниң 20 хире машина-техниказы быжыглаттынган, олар орайга дээр ажылдап турарлар”.
Кызыл кожууннуң чагыргазының социал-хандырылга талазы-биле харыылап турар даргазы Айдаш Ховалыг-биле ужуражып, чоруттунуп турар ажылдар дугайында сонуургадывыс:
-Кызыл кожууннуң девискээринде суг эриинде турар “Серебрянка”, “Дар” дачалары, Каа-Хем суур база Ус-Элегес чоогунда Оттук-Даш арбанында онза байдал чарлаттынган. Үер айыылындан баш бурунгаар камгаланып, бо угланыышкынныг ажылды чорудуп турар бис: Онза байдалдар яамызы, Каа-Хем кожууннуң база Каа-Хем суурнуң чагыргазы хүннүң-не суг объектилеринче үнүп, хайгаарап, чонга тайылбыр ажылын доктаамал чорудуп турар. Байдал нарыыдай бээр болза, 9-10-08 дугаарлыг телефонче долгаарын дыңнаттывыс. Каа-Хем суурда “Авырга” спорт комплекизинде, Солаан Базыр-оол аттыг культура төвүнде база Оттук-Даш чоогунда Ус-Элегес школазында түр када чурттаар оран-саваны белеткээн. Хуу машиназы чок кижилерге база автобус, машина-техника белен.
Чурттакчы чонну суг айыыл-халавындан камгаланып, оваарымчалыг болурун сагындырдывыс.
Чаяна Шилова материалды белеткээн.
