Тывага "Росавтооруктар"-ның комиссиязы кээп чораан. Үер-халап уржуунда республикада элээн каш аргыжылга оруктары үрелген.
Бойдустуӊ айыыл-халавыныӊ чедирген когаралыныӊ хемчээлин тодарадыр ажылга дузалажырын Тываныӊ Баштыӊы Владислав Ховалыг ук ведомстводан дилээн.
РФ-тиӊ Орук-транспорт яамызыныӊ айтыышкынын күүседири-биле республикага июнь 16–29-туӊ хүннеринде Росавтодорнуӊ комиссиязы ажылдап турган.
Комиссиязыныӊ специалистериниӊ баш бурунгаар санаашкыны-биле алырга, үер-халап республикага 248 млн рубль когаралды чедирген. Үрелген оруктарны, көвүрүглерни септээр ажылдарныӊ планын Тываның Орук-транспорт яамызы тургускаш, ону күүседир. Орук кылыр ажылдарны регионнуӊ удуртукчузу бодунуӊ хыналдазынга алган.
Хемнерниӊ суу үерлээрге, республикада ниитизи-биле 3 км хире автооруктар, 11 көвүрүглер, суг эрттирер 4 хоорзалар үрелген дээрзин Тываныӊ Орук-транспорт яамызы дыӊнаткан. Коммиссия орук объектилериниӊ шуптузун шинчилеп көргеш, оларны септеп болур дээн.
Оруктарны септээр ажылдарны ийи чадага хуваар, ону 2024 чылдыӊ ноябрьда доозарын эксперт комиссиязы сүмелээн.
Абакан — Ак-Довурак биле Суг-Аксы — Баян-Тала оруктарында түр үениӊ кежиглерин, а Чадаана — Ийме, Чадаана — Бажыӊ-Алаак, Чадаана — Суг-Аксыныӊ аразында оруктарда үрелген участоктарында оюп эртер черлерни кылган.
ТР-ниӊ Чазааның медээзи-биле Р. ДЕМЧИК белеткээн.