Ада-чурт камгалакчызының хүнү чоокшулаан тудум, чүнү белекке бээр деп айтырыг тургустунуп кээр болгай. Эр улус колдуунда боттарының күзелин чугаалаксавас боор. Ынчалза-даа оларга бир-ле онзагай белек сөңнээри артык эвес.
Дыка хөй эр улус улуг өртектиг белектерге хөңнү чок, ынчалза-даа бичии-даа чүүл оларның сеткилин өөртүптер. Ынчангаш улуг чарыгдал үндүрери албан эвес. Чоок кижиңерге кандыг-даа үеде эң-не ажыктыг чүүлдер — зонт, перчаткалар азы шарф берип болур силер.
Бодунуң холу-биле кылган белектерден база ойталаан херээ чок. Холу-биле кылган открытка, фото-чуруктар коллажы, плакаттар дээн ышкаш сеткилинден кылган ажылдар кичээнгей чок артпас.
Чамдык эр улус аңгы-аңгы гаджеттерден угааны үнер. Ынчангаш байырлалында ажыктыг болгаш чугула электроника алыры оларга улуг аас-кежик. Чижээ, хөгжүм колонкалары, компьютер мышказы азы наушниктер. Бо херекселдер ындыг-ла улуг өртектиг эвес-даа болза, кажан-даа артык эвес чүүлдер-дир.
Бир эвес ынак кижиңер, эжиңер азы коллегаңар спорт-биле өңнүк болза, фитнес-браслет сөңнеп болур силер. Ол дээрге кадыкшылының байдалын, кайы хире калорий чарыгдап турарын, уйгузунуң шынарын дээш өске-даа көргүзүглерин хайгаараар гаджет-дир.
Бойдус-биле харылзаа дыка хөй эр кижилерни сорук киирип турар. Ынчангаш бойдуска сонуургалдыг кижиңерге аян-чорук кылырынга ажыктыг чүүлдерни белекке сөңнеңер, чижээ, фляга (хойлаарак), термос азы дуран, ол ышкаш эптиг рюкзак. Балыктаарынга ынактарга тускай садыгларда чүү-даа бар. Шилиири берге болза, тодаргай түңнүг сертификатты берип болур. Бодунуң шагда садып алыксаан чүүлүн шилип тургаш, садып алзын.
Эр кижиниң чүрээн хырын таварыштыр чаалап алыр дээр болгай. Ынчангаш чиртингир боодал чечектер тыпсыры база бир солун, амданныг белек-тир. Ооң аңгы-аңгы хевирлерин чагыдып ап болур: колбасалардан, манчылардан азы далай продуктыларындан. Ындыг белек ылап-ла кичээнгей чок артпас.
Ада-чурт камгалакчызы эжиңни өөртүр деп бодаар болзуңза, сеткилиңден берген белээң уттундурбас болуп артар.
Чурукту интернеттен хоолгалаан.
“Шын” №6 2025 чылдың февраль 20
